ROMELU LUKAKU – GOAL KHUNG TURA PIANG

ZoFooty #FootballKaida

ROMELU LUKAKU – GOAL KHUNG TURA PIANG

Chelsea striker Romelu Lukaku hi i ngainat zawng a ni em? I lo ngaina lo a nih pawhin a chanchin hi chu a ngaihnawm phian a sin.

Lukaku chuan, “Football ngainatuten rilru pau khauh chungchang an sawi nuam an ti ṭhin. Kei hi in hriat tawh zinga rilru paukhauh ber chu ka ni hial maithei a ni,” tiin hun harsa a patlang tih chu zep a tum lo a, chhuang takin a sawi tawh zawk.

A CHANCHIN CHU
Romelu Menama Lukaku Bolingoli hi Antwerp, Belgium-ah May 13, 1993 khan Congolese nupa karah a a piang. A pa Roger chu professional footballer a ni a, Lukaku pawh hian naupan tet aṭanga football a ngaina reng a ni.

School lamah Lukaku hian harsatna a tawk nasa a, a zahzum avangin a ṭawngchhuak ngam ṭhin lo a, ṭhian kawm loin amah chauhin kil khatah a lo awm ve mai chawt mai ṭhin. Mahse, dar a han ri a, chhun chawlh a hun chiah chuan Lukaku chu midang daih a ni tawh a, a ball pet chu naupang dangten an thlir tawh zawk ṭhin.

An zirtirtute pawhin Lukaku tuina chu an hmuh hmaih lo. Mahse, kum 1999 a rawn inherchhuah chuan a pa chuan football khelh a chawlhsan a, an chhung sum hnar a tawp a ni ber. Fridge-a chawhmeh an dah ṭhin pawh a ni telin a tlem tial tial a, a nu Adolphine chuan a faten ei tur an neih theih nan theihtawp a chhuah.

KHAM KHAWP HMU LO
Lukaku chuan, “Kan tla bal a ni tih chu hai rual a ni lo. Nitinin ei tur ngai reng kan ei a, chu chu chhang leh bawnghnute a ni. Kan la naupang avangin thil awm dan kan la hre thiam lo zawk. Mahse, ṭum khat chu ka nuin fridge aṭang chuan bawnghnute bawm chu a la chhuak a, a daih zai theih nan bawnghnute chu tui hmangin a pawlh dal a, chu chuan kan dinhmun a sawifiah chiang hle,” tiin a sawi.

Ei tur kham khawp an nei lo ringawt a ni lo a; TV, current leh tui lum hman tur an nei tawh lo. Lukaku chuan, “Cable TV a tawp hmasa ber a, football kan en thei ta lo. Current kan nei lo zui a, kar hnih thum tawp te kan nei lo. In bual dawn ila, tui lum kan nei tawh lo. Ka nu chuan stove-ah tui a lum a, ren takin ka hmang,” tiin hun harsa an tawh dan a sawi chhuak.

Tichuan, Lukaku chu a intiam ta. A intiamna chu professional footballer nih a ni a, a nu mittui tla chuan a tum a ti ruh sawt bawk. Lukaku chuan, “Ka intiamna chu midang ka hrilh lo. |um khat chu school aṭangin ka haw a, ka nu ṭap lai ka hmu. Ka nu bulah chuan; Nu, a la danglam dawn. Anderlecht tan ka la khel dawn a, chu chu a thleng thuai ang. Rilru hahna tur i nei tawh lo ang,” tiin a nu bulah a intiamna a sawi chhuah thu a sawi.

CHONA A HMACHHAWN
Khelmual lamah pawh Lukaku hian harsatna a tawk. Kum 11 mi lek a nihin K. Lierse SK tan a khel a, a len fal em avangin naupang dang nu leh pa te chuan ringhlelin a ID te an en sak an dil hial a; Antwerp, Belgium-a piang a ni chungin ‘Khawia ṭanga lo kal nge?’ tihtein an zawt. Belgian naupang tan chuan nu leh pa ṭhenkhat zawhna chu hriatthiam a har hle a, mahse a hnual phah lo – a rilru ti paukhauh tu zawk a ni.

Kum 12 a nihin a nu pa a thi a, a pu hian a thih hmain thu a tiamtir. A pu chuan, “Ka fanu hi duat takin lo enkawl ang che,” tiin Lukaku chu a nu enkawl ṭha turin a chah. Chumi zawhah chuan Lukaku chu rim lehzualin a thawk a, engkim mai chu ‘final’ ang maia pawimawhah a ngai. Tichuan, May 13, 2009-ah chuan Lukaku chuan professional contract a ziak ta. Kum 16 pianchamphaah contract a ziak fel tihna a nih chu.

Kum 2010 a nih meuh chuan Lukaku chu Europe club hrang hrangin an sawm tawh a, amaherawhchu a pain chhuah a la remti tlat lo. Lehkha la zir turin a duh a, la inchher hriam turin a duh bawk. Anderlecht-ah chuan la chamin kum naupang tak chung siin goal 41 a khung sak der a, hmabak a nei êng hliah hliah. August 2011-ah chuan Lukaku chuan Chelsea tan contract a ziak ta a, kum 18 mi chauh la ni mah se pound maktaduai 29 man a ni der tawh.

Chelsea-ah beisei a phak loh avangin loan hmangin West Brom-ah a kal a, Baggies tan hian match 38-ah goal 17 a khung – Premier League-ah a rintlak dawn tih a lantir. Heti chung hian Blues hotute a la ti lungawi pha lo, Everton-ah loan-in a kal leh.

STRIKER MANTO
Toffees-ah hian Lukaku hi a che ṭha lehzual a, league match 31-ah goal 15 a khung. Everton hian Chelsea aṭangin pound maktaduai 28-in an lalut. Helai hmunah hian Lukaku-a’n hming a chher a, season li chhungin goal 87 tehmeuh a khung. Manchester United chuan Lukaku chu pound maktaduai 75-in an lalut a, Red Devils-ah Lukaku a che ṭha tawk lo a, a technique ṭhat tawk loh avangin sawisel a hlawh. Mi tam tak chuan Lukaku hun a zoah a ngai.

Amaherawhchu Lukaku ring tlattu a awm a, chu chu Antonio Conte a ni. Italian manager hian Inter Milan-ah kum 2019 khan Lukaku hi pound maktaduai 74-in a lalut. Conte hian risk a laah ngaih theih mah se Lukaku hian a beiseina a ti thlawn lo. Belgian striker hi Inter Milan-ah hian weight a ti hniam a, Conte hnuaiah defender hmachhawn dan a zir belh a, khawvel striker ṭha ber zinga mi a ni ta.

Serie A-ah Lukaku hian season hnih chhungin Inter tan match 72 khelin goal 47 a khung a, chu aia pawimawh chu Inter hi Serie A nomawi a chawipui. Belgian striker hi amah hnawltu Chelsea-in an hmu tai leh a, tun nipui bazarah khan pound maktaduai 97.5 zetin London club hian an lei chhuak.

Tunah chuan naupang laia ei tur kham khawp hmu lo kha, club hrang hrang leina belhkhawm ringawt pawh pound maktaduai 300 vel zet a a ni ta. Belgian striker hi a man a to satliah lo, Chelsea tana Premier League match a khelh lehna hmasa berah Arsenal hmachhawnin goal a khung nghal a, Gunners defender Pablo Marí a chaih phar hneh hle.

CHONA THAR
Amaherawhchu Lukaku hian hmabak a la nei, season liam ta khan Serie A Most Valuable Player-a thlan ni mah se Cristiano Ronaldo a tluk loh avangin top scorer a ni lo. Belgian striker hian Premier League-a a inkhelh chhung zawngin top scorer a ni lo bawk a, tun ṭumah hian nih ngei a tum dawn.

Lukaku elpui turte chu Hary Kane, Ronaldo, Mohamed Salah leh Jamie Vardy te an ni dawn a, a awlsam dawn lo tih hriat mah se hun harsa tam tak paltlang tawhtu Belgian striker tan theih loh tur a awm dawn em ni? Amah hi ‘GOAL KHUNG TURA PIANG’ a ni miau si.