RONALDIHO PIANCHAM PUALIN – Lawmkima Hmar

Ronaldinho tia hriat lar Ronaldo de Assis Moreira chuan vawiin hian kum 37 a pumhlum ve ta chiah mai. A hmel a tha lo nain a duhawm asin!

* A nu Dona Miguelina Elói Assis dos Santos hi nurse nih tum, a tum hlen ta lo thil zuar thin niin a pa João de Assis Moreira hi inkhel ve thin tho niin lung tha lo nei a ni a, Ronaldinho kum 8 mi a nih laiin a lung tha lo hi Swimming Pool-ah chesualin a boral.

*Ronaldinho tih hi a tira a hming a ni lo va, kum 8 mi a nih atanga mi mit la tawhtu hi an team-a te ber leh naupang ber a nih thin avangin a koh duat na’n an hmang ta a ni. Brazilian-ho hming tawpa inho/-inha tih hi ‘te-a’ (little) tihna a ni a, Ronaldinho tih chu Ronald-te-a tihna a ni. Rotea, Liantea, Ramtea, Muantea etc. kan tih ang chi hi a ni mai.

*Futsal leh Beach Football thiam tak niin a u Roberto chuan Gremia-ah contract a ziak a, amaherawhchu, inhliam avangin a inkhel rei lo. A u inkhelh loh hnuah Ronaldinho hi a lar ve chauh.

*Kum 13 mi a nih laiin an khawtual Youth Team-ah a thiante chu te chu 23-0 ngawtin a chak pui a, goal awm zawng zawng hi ama thun vek! Heta tang hian a theihna chu miten hmu fuhin chanchinbu miten an veh tan.

*Gremio-ah bul tanin kum 1998 khan kum 18 mi a nih laiin match 48 atangin goal 23 a thun a, a lar hle.

*Kum 2001 khan Arsenal chuan hmu fuhin lakluh an tum a, Ronaldinho pawhin duh mahse, European Union member ni lo, ram tana la khel lo tan England in Work Permit an pek duh loh avangin North London club hi a zawm thei ta lo. Arsenal a zawm theih hma chu Scottish Premier League club St Mirren tana loan-a khelh rih tum mah se passport lem thubuai a neih avangin a tum a tlawlh.

* Hemi kum hian French club Paris Saint-Germain chuan €5 million a la lutin kum 5 daih contract an ziahpui a, Brazilian player Aloísio bakah midfielder Jay-Jay Okocha leh striker Nicolas Anelka te nen an awm ho.

*Kum 2002 Japan/South Korea World Cup Quarter-final a England nen an inhmachhawn tumin 40yards a hla atanga free-kick pet goal in David Seaman a khai a, a larpui hle.

* Kum 2003 khan FC Barcelona president Joan Laporta chuan inthlan au hlaah David Beckham lakluh a tiam a, mahse, a tum anga thil kal lovin England winger hian Real Madrid a pan. Barca hian Manchester United in lak tuma an dawr mek Ronaldinho chu dawr zui ve nghalin sum tam zawk nena thlemin €30 million in an la lut.

Manchester United player hlui Quinton Fortune chuan Ronaldinho an lak theih loh chhan chu khawchhiat lutuk vang niin a sawi.

Kum 2003 khan Manchester United chuan Real Madrid lamah David Beckham hralhin Sir Alex Ferguson chuan an player lar tak thlak na’n hian player ropui tak lak a duh a, chu chu World Cup a che tha tak Ronaldinho a ni.

Manchester a zin turin an chah chhuak ta ngei a, a contract chungchang sawipui a, engkim tihfel an tum. United pawh an inring tawk a, USA-a Tour an neih huna hruai theih an inrin thu an puang hman.

Mahse, Manchester Airport a rawn thlen hian ruah a sur nasa em em a, khaw awm danin a zir loh em avangin inbiakna a kaltluang thei lova, a sik leh sa thu-ah pawh Ronaldinho hian Spain lam awn ta zawkin Barcelona-in an la ta a ni.

South Africa & Man. Unite player Fortune chuan khami ni khan khua tha se chuan United hian Ronaldinho hi inbiakna tha tak neihpuiin an lak ngei a rin thu a sawi.

*Ball a thiam avanga hriat hlawh tak hi kum 2002 World Cup champion Brazil team a an player pawimawh niin Barcelona tana a khelh laiin kum 2006 khan Arsenal hnehin Champions League title a lakpui a, kum 2005 khan Balon d’Or dawngin kum kum 2004 leh 2005 khan FIFA World Player of the Year atan thlan a ni a, 2005 leh 2006 khan FIFPro World Player of the Year chawimawina dawngin kum 2006 khan UEFA Club Footballer of the Year atan thlan a ni bawk a ni.

*Club hrang hrang tana a khelh hnuah kumin January 16 khan football a chawlhsan thu puan a ni.