(Admin leh Author te kan buai deuhva, internet chiang lo leh current mumal lo nen, nizan inkhel review hi duh angin kan rawn tichhuak hma thei lova. ZoFooties te hriatthiamna kan ngen a ni.)

Euro 2012 khelh meka quarter final hmasa berah Portugal chuan Christiano Ronaldo goal hmangin Czech Republic an hneh a, semi-final ah Spain leh France-a chak zawk zawk an tum ang. 

Tute nge khel?  
Czech Republic  (4-5-1) : Cech; Selasskie, Kadlec, Sivok, Limbersky; Hubschman (Pekhart), Plasil, Jiracek, Darida (Rezek), Pilar; Baros

Portugal (4-3-3): Patricio; Pereira, Alves, Pepe, Coentrao; Veloso, Moutinho, Meireles (Rolando) ; Nani (Custodio), Ronaldo, Postiga (Almeida).

First half chu a teuhvn a ral
Czech Republic Captain Rosicky a khel lova, a aiah Victoria Plzen midfielder kum 21 mi, Vladimir Darida a khel thung a. Milan Baros bawk lone striker-in an hmang a. Portugal paw’n Postiga mal tlat tirin a sir ah Christiano Ronaldo leh Nani an awmtir bawk a. Czech Republic-in inkhel an kick off a.  Czech Republic lam hian bul an tan tha hle a,Portugal hi an nawr bet a, Portugal hi an che thei der lova. Amaherawhchu clear chance an nei thei bik lo a ni.

Portugal lam zawk hi Ronaldo hmangin an hlauhawm thei hle a. Minute 30 naah Pepe ball tha zet chu Ronaldo chuan mawi lutukin a lo ‘bicyle kick’ a, mahse a goal lo hlauh a. First half tawp dawn tepah Ronaldo bawk hian chance a nei leh a. Box chhungah ball tha taka a control tawh hnuin goal ban a pet per a. Portugal lam hian hma an hruai teuh hle a ni. First half chu a teuhvn a ral a, half time a ni zui nghal a.

Second half-ah mamawh chhanna “Christiano Ronaldo”
Second half-ah hi chuan Portugal lamin bul an tan tha ve thung a. Minute 51 naah Portugal lamin free-kick an hmu a. Captain Ronaldo a rawn dingchhuak a. Far post-ah a pet a, a goal dawn emaw tih laiin goal post bawk a pet per leh a. Mi tam tak chuan goal post pet per hi ‘chakloh hri’ an ti thin a, Portugal hi a vanduai zawk an nih ring an tam ta hle bawk.

Half chance kan hmu zeuh zeuh a. Joao Moutinho, Nani leh Hugo Almedia te paw’n chance an nei leh zeuh zeuh a. Pilar pawh Portuguese defender tan a hnawksak thei khawp mai. Minute 60 naah Almeida chuan Nani cross a head goal a mahse offside a lo ni hlauh a, goal-ah pawm a ni lova. Portugalvanduaina a kaltluang zel a tih theih.

Hun pangaiah an in draw thei mai dawn anih hi tia fans te’n an rin laiin minute 78 naah Portugal Captain Ronaldo a rawn che ta. Moutinho cross tha zet chu Ronaldo chuan Peter Cech-a man hman lovin a head goal a. Thawm a tha kher mai. Goal dang a luh belh lova. 1-0 in Portugal hi an chak ta a ni.

Sawi zui ang
* 1996 Euro quarter-final ah khan Czech Republic hian Portugal hi 1-0 in an lo hneh ve tawh thung a. Final an lut nghe nghe a. Final-ah Germany lakah an vanduai hlauh a ni.

* Euro 2008 khan group stage-ah an intum leh a. 3-1 in Portugal hi an chak a, Ronaldo pawh hian goal 1 a thun ve nghe nghe.

* Czech Republic lam hian an Captain Rosicky hi chhawr thei ta se an chak kan ring em?

* Czech Republic hi negative goal difference hmanga quarter final lut awmchhun an ni a. Hetiang chiah hian Euro 1996 khan Czech Republic tho hian quarter-final an lo lut tawh bawk a ni.

* Portugal hian Euro an khelh apiangin quarter final tal an la thleng ziah a ni.

* Portugal hian tun Euro-ah hian goal post hi vawi 5 an pet per tawh a. European Championship history-ah hian tournament khat chhunga goal post vawi 5 pet per thei ram hi Portugal hma hian ram pathum chiah an la awm a ni.

* Ronaldo hi Portuguese player, tournament lian panga a ram tana goal la thun vek awmchhun a ni. Chungte chu  Euro 2004, World Cup 2006, Euro 2008, World Cup 2010 leh Euro 2012 te an ni.

* Portugal striker Postiga chu a inhliam a, semi-final ah a hmel kan hmu dawn lo a ni.

* Portugal Captain Ronaldo chuan an match hmasa pahnihah goal a thun lova. Denmark nen an intum tum phei chuan ‘one on one’ ah pawh a pet goal lo a ni a. Mahse Netherlands lamah erawh goal hnih thunin amah sawiseltute ka a hup thung. Tunah pawh chakna goal a thun leh a ni a. Hei vang hian mi tam tak chuan major tournament-ah pressure a zo tawk a ni an ti thung a. Tin, chutih rualin Euro khel ve lo mahse thiam em em bawk si, Messi nen bawk an tehkhin leh thova. Hei erawh hria ila, Messi vs Ronaldo hi chu Pele vs Maradona ang deuh hi a ni a. An tha ve ve a, an thiam ve ve .Chuvang chuan Footballer ropui Messi leh Ronaldo khel hmu theia kan dam hi lawm zawk ang u.