Rooney to Liverpool. Charlie Adam to Barcelona. Transfer lian tham thleng lo tur te.

Posted on June 25, 2011July 10, 2011 by ZoFooty

Transfer season a ni a, ‘A lut maithei’, ‘Chumi club chuan chumi player chu an lei duh’ tih angreng a tam ngei mai. Dik deuh deuh a awm a, dik lo a tam zawk. Transfer thleng thei tam tak a awm a, a thleng lo tur ho hi en ve chhin teh ang.

2011/12 Transfer season chhunga tansfer thleng lo tur te:

Wayne Rooney to Liverpool
Tunkum mai ni lo, Rooney football khelh chhunga he transfer hi a thleng a nih ngat chuan khawvel tawp a hnai tawh hle a ni ngei ang. Manchester United leh Liverpool inhuat zia leh an inel zia chu sawi belh ngai loin kan hre vek awm e. United hian an player pawimawh hi an hmelma kumhlun hnenah hian engtikah mah an hralh phal a rinawm loh. Chumai a ni lo a, Rooney hian a naupan lai atangin Everton a tan tawh a, ama sawi dan takah Liverpool huatna thinlung nena puitling a ni. Club in an phal lo a, aman a duh lo bawk a, Liverpool in Europe ah an khel pha lo bawk a, he transfer hi a thlen a rinawm loh.

Charlie Adam to Barcelona

Tuna Barcelona team hi tunlai a football team tha ber an ni a, midfield hi an chakna lai ber a ni. Xavi a awm a, Iniesta a awm bawk a, ball sem tu tur an mamawh belh hrih lo. Hei vang tak hian Blackpool tana khel tha tak Charlie Adam hi an la lo ang tih huai takin a sawi theih awm e. 2010/11 a a chet that avangin EPL PLayer of the year nominee a ni pha a, Liverpool in lei tumin an veh mek a, an lei thei dawn niin a lang. Barcelona hian Liverpool a a lut tur hi ngaingam loin neih ngei tumin an bei dawn lo a, an team tihchak nan sum tamtak nen an thlem lo ang.

Lionel Messi to Real Madrid

Barcelona youth academy chhuak, Barcelona player ropui lo ni ta Lionel Messi hian Real Madrid jersey a ha lo ang. Real Madrid leh Barcelona inhal dan hi chu a ril raih bik mai a, sakhuana leh nunphung nen a inzawm avang hian an inkarah player transfer a awm ngai mang lo. Real Madrid coach ah Jose Mourinho a rawn awm a, El Clasico khelh zawh taka an inpuhchhiat dan leh an tawngkam nat zia pawh kan la hre vek awm e. Heng zawng zawng han ngaihtuah hian he transfer pawh hi thleng lo tur chiang tak a ni.

Samuel Eto’o to Brescia
Barcelona leh Inter Milan lama hlawhtling taka khel tawh Samuel Eto’o chuan tunhnaiah Inter Milan chhuahsan a duh thu a sawi a, England lama kal a chak thu a sawi. Europe club lian hrang hrang nen an sawizawm nghal a, Arsenal, PSG etc. an rawn ghal. Hetih tehnuai a nih lai hian Serie B lama tla thar Brescia hian lei duh mahse an lei thei lo ang. Brescia hian lei tumin an la dawr lo a, dawr pawh ni se Eto’ hian a duh lo ang.