RoundGlass Punjab an bazar zel

I-League club RoundGlass Punjab FC chuan Indian footballer langsar pahnih Robin Singh leh Rino Anto an lakluh thu an puang.

Kum 31 a upa Robin Singh hian season liam ta khan ISL club Hyderabad FC atangin ‘loan’ in Real Kashmir tan a khel a, Indian striker langsar pawl ni thin mahse hliamin a tibuai ve fo. Tata Football Academy chhuak niin club lian East Bengal, Bengaluru FC, Delhi Dynamos, FC Goa, ATK leh Pune City tan pawh khel tawhin India tan vawi 30 a inlan tawh.

TFA – a C.Malsawmkima, Henry Gangte leh Lalramluaha te batchmate Rino Anto hi Bengaluru FC in Indian football an thunun laia an defender pawimawh a ni a, nomawi tam tak a chawi tawh zingah ISL, I-League leh Federation Cup a tel. India rama club lian tam takah khel tawhin a tawnhriat hi RoundGlass Punjab enkawltu Ashley Westwood – a tan a tangkai ngei ang.