Football Association chairman David Bernstein chuan Roy Hodgson-an international leh tournament football-a tawnhriat a lo neih tawhna leh a hlawhtlin tawhna chu England head coach thar atana  lâk a nihna chhan ber a nih thu a sawi.

Kan hriat angin, kum 64 a upa Roy Hodgson hian Fabio Capello a thlâk dawn a, tun season zawh ve leh England tana a hna hi a tan nghal dawn a ni.

Hodgson hian 1994 khan Switzerland chu World Cup a lo khelhpui tawh a. A hnu kum 10 velah Findland chu hlawhtling takin a lo enkawl tawh bawk a ni.

Bernstein chuan, “Roy thlang tur hian (FA chu) kan inthurual hle a. International leh European football-a tawnhriat ngah tak a ni hi kan duhna a ni. Tun tum hi FA in England manager, international football-a tawnhriat ngah kan lâkluhna hmasa ber a ni a. Tournament lian tham a hmachhawn hnem tawh avangin, 2014 World Cup, Brazil-a khelh turah pawh kan ruahmannaah a tel nghal a. UEFA leh FIFA hnuaia hnathawh phalna nei a nih avangin khawi hmunah mah buaina kan nei dawn lova. A tawnhriat bakah team a din thiamzia hian midang aia thlanawm a nihtir a ni,” a ti.

Mi tam takin Tottenham boss Harry Redknapp chu England manager atana an beisei laia Hodgson an la ta chungchang zawhna chu Bernstein chuan, “Manager tuma hming kan sawi thei lova. England manager atan hian duh bik kan nei a, mi pahnih aia tam kan enchhin a ni. Manager atan hian mi pahnih aia tam kan ngaihtuahnaah an awm a, tuna kan thutlûknaah hian kan lawm khawp mai. Sum leh pai chungchangah kan buai lova, mi tha ber kha kan duh a ni tawp mai a, Roy hi kan duh tlan ber a ni,” a ti.

FA director of football development, Sir Trevor Brooking, chuan Hodgson-a hna chu a harsa dawn tih a sawi a. “Tu pawh manager ni mahse he hna hi hna hahthlâk a ni. Mahse kan coach lâk thar hian hmasawnna min thlen ngei ka ring a ni,” a ti.

England captain hlui Steven Gerrard leh Fulham chairman Mohamed Al Fayed te chuan England manager atana Roy Hodgson ruat a ni chu tha an tih thu an sawi.

Liverpool-ah Gerrard hian Hodgson hi a hrawn tawh a, “Pa tha tak a ni a, mihring enkawl thiam tak a ni. A hnuaia khelh hi ka châk tawh khawp mai,” a ti.

Hetih lai hian Hodgson chuan Steven Gerrard chu captain atan a ruat mai ang em tih zawhna chu, “Nakina la ngaihtuah tur a ni ang,” a ti.

Fulham neitu Al Fayed chuan, “Roy hi ka lawmpui takzet. A hna tha taka a thawh ngei ka beisei. England tana manager pahnih ka pêkna a ni ta,” a ti! “Kei leh Fulham chu Roy-a tantu kan ni zel dawn a, England leh FA tantu pawh kan ni zel ang. Fulham-ah hun nuam tak kan hmangho a, Roy hi mi fing tak, tawng hrang hrang thiam, Finnish thlenga thiam a ni a, European Championship-ah pawh kan champion ngei ka ring a ni,” a ti bawk.

Arsenal midfielder Jack Wilshere: “Manager tha ber zinga mi a ni tih hriat sa a ni a, England tana mi duhawm ber a ni,”

WBA winger Chris Brunt: “Roy Hodgson ka lawmpui e. Thla 18 liamta chhunga kan tana hna tha tak a thawk angin, England tan pawh hna tha tak a thawk ngei ang tih ka ring. Coach ropui tak a ni a, mi tha tak a ni,”

WBA striker Peter Odemwingie: “Roy Hodgson ka lawmpui a, a hna thar hi tha taka thawkin, English national team tan hlawhtlinna a thlen ngei ka beisei,”

Gary Lineker, England striker hlui : “Roy Hodgson tan vanneihna ka duhsak e. He pa hi chance i pe teh ang u,”