Barclays Premier League en thin chuan RVP hi tunge a nih kan hria. Robin van Persie tihna a ni. He Dutch striker hi kum 2011 a Arsenal pet goal khawl a ni a, Arsenal thiampuipa leh innghahna, captain ‘Vantastic’ an tih kha a ni. van Persie hian kum 2011 chhungin Premier League-ah goal 35 tehmeuh mai thun a, Thierry Henry record dinglai (goal 34) a khum a, Arsenal player awm tawh zingah kum khat (calendar year) chhunga Premier League-a goal thun hnem ber a nih thu te, Alan Shearer-a record (goal 36) a khum teuh zia te hi chu kan hriat vek tawh hnu a ni.

Robin van Persie hian Shearer-a record a khum zo ta lo hi uipui kan awm ang a, pawiti lem lo pawh kan awm ang. Arsenal manager Arsene Wenger pawhin a lo ui ve khawp mai a, QPR an hneh tum khan field sirah a lo tang hle a, goal tam zawk a thun lo chu pawi a ti hle a ni tih a sawichhuak. Mahse Wenger hi a ‘confi’ khawp mai a, RVP hian kum 2012 ah goal 36 chuang khungin, Premier League history-ah kum khat chhunga goal thun hnem ber record a neih theih ngei a rin thu a sawi a ni.

Wenger chuan, “Tunkum (2012) ah hian kum 2011 a a game khelh zat hi a khel leh thei angem tih chu a hriat loh a, mahse engmah hi theih loh a awm lo. Tunah hian a theihna vawrtawp a thleng mek a, a ‘form’ em em bawk a, kumthar a nih vang ngawtin hei hi a danglam nachhan tur ka hre lo.

“A hmel leh tawngkamah chuan a (van Persie) a tilang hauh lo ang a, mahse record a break lo hi chu amah pawhin a ui viau ang. ” tiin a sawi.

Arsene Wenger hi English Premier League mai ni lo, khawvela manager langsar leh fing ber pawl a ni a, a thusawi hi chhan nei lova sawi mai mai a ni lo ang tih a chiang. A striker ‘chuam’ hi goal tam zawk thunbelh zel turin a fuih phur a, chumi pahin club dang ho a tihthaih pah tih kan hrethiam mai awm e.

source: goal.com