SAFF Champion India!

#ZoFooty

SAFF Champion India!

Zanin dar 8.30-a khelh SAFF Championship Final-ah India chuan 3-0 in Nepal an sawp a, a vawiriatna atan an champion. He inkhel hi MFA Honorary Secretary Pu Lalnghinglova Hmar (Tetea Hmar) chuan a hmunah a en a, Pu Tetea Hmar hi SAFF Congress hmangin Maldives ah hian a kal a ni.

India hian record nei țha berin vawi riatna atan an champion ta a, an champion hnuhnun ber țum chu 2015 ah a ni. Maldives vawi hnih champion tawhin Afghanistan, Bangladesh leh Sri Lanka te vawikhat țheuh an champion tawh bawk.

Tute nge khel?
India coach Igor Štimac chuan an match hnuhnung bera Maldives an hneh țuma Starting XI ațangin pahnih a thlak a, red card vanga hnawhchhuah Subhashish Bose aiah Chinglensena Singh a lut a, Brandon Fernandes aiah Anirudh Thapa a lut bawk. Mizo player awmchhun Lalengmawia (Apuia) pawhin inkhel bul a țan leh a ni..

Tun țum SAFF Championship-ah hian India in match nga khelin match hnihah chiah centre back Chinglensena Singh a start a, vawikhat erawh bench ațanga lutin match hnih erawh a khel lo. Ani chiah hi tun tournament-a India in centre back pangngai an hman awmchhun a ni. Centre back anga hmante hi full back an ni a, Sandesh Jhingan thlaktu tur India in an la nei meuh lo a ni.

Goal luh lohna first half
National Football Stadium, Male, Maldives-a inkhelah hian ruah a sur nasat avangin khelmual a nal em em a, hei hian inkhel pawh a tih hmuhnawm loh phah a ni. Team pahnihte an fimkhurin game mumal an khel thei lova, half chance erawh an insiam zeuh zeuh thung.

India hian Anirudh Thapa hmangin goal an khung teuh hle a, Yasir Mohammad pet țha tak chu Nepal goalkeeper Kiran Limbu chuan lo dang perin hemi per hi Thapa hian a pet goal ngei dawn nia alan laiin Limbu bawk hian țha takin a lo dang leh a ni.

Team pahnihten an tum angin an khel lo tih a hriat a, ground a nal avangin an tawlhthlu fo bawk.

Half time hmang țha zawk India!
First half-ah goal a lut lova, second half ah erawh India in goal thum an khung ta thung! India Coach Igor Štimac hi Maldives an hneh țuma red card a hmuh avangin technical area-ah a awm phalsak a ni lova, nimahsela half time laiin a naute a fuih țha tih a hriat a, India in half time an hmang țangkai zawk a tih theih.

Groud la nal mah se team pahnihten khelmual awmdan an hrechiang tawh a, passing game an khel ngam tawh a, first half aiin second half-ah game a hmuhnawm zawk a ni. Minute nga pawh a ral hmain full back Prital Kotal chuan byline ațangin țha taka cross lutin Sunil Chhetri chuan minute 49 naah a tauh goal a, he goal khung tur hian Chhetri hi a tlan lut țha hle. Minute hnih pawh a ral hmain Yasir Mohammad chuan Suresh Singh tan siamsakin Suresh hian mawi takin a pet goal.

India in game an thunun chhunzawm a, huntawp dawnah substitute Sahal Samad chuan 18 yard box chhungah țha taka ball lalutin a pet goal a, 3-0 in India an chak.

Player ropui Chhetri!
Chhetri hian tihian ram tan goal 80 khung tawhin ram tana goal khung tam lamah pangana niin Lionel Messi record a nihrual ta chiah a, Chhetri hian tun tournament game nga ah goal nga khungin top scorer a ni.

Chhetri hi final ah hian Man of the Match-a thlan a nih bakah tun tournament-a Most Valuable Player (Best Player)-ah thlan a ni bawk.

Chhetri hi tunah hian kum 37 ni tawhin India player țha ber ala ni thei a, a fakawm hle a ni.

India khelh chhoh dan.
India hi champion tura rinkai annih avangin nuamsa taka final lut tura ngaih an ni. Nimahsela an match hmasa pahnihah team nem pahnih – Bangladesh (1-1) leh Sri Lanka (0-0) an draw avangin sawisel an hlawh nasa em em a, mahse Nepal (1-0) leh Maldives (3-1) hnehin an insiamțha a, final lutin an champion zui a, hneh loh nei lo awmchhun an ni.