Mizo footballer pahnih, Jeje Lalpekhlua leh Larindika Ralte te telna India football team chu South Asian Football Federation Cup ah an champion.

South Asia ram pariat te intihsiakna, SAFF Cup final hi Pathianni tlai dar 6 khan Jawaharlal Nehru stadium, Delhi-ah khelh a ni a, champion lai India chuan si li fai a Afghanistan hnehin lallukhum hi an humhim a ni. India hi vawi 6 an champion na niin, champion ngun ber an ni. India coach Savio Medeira hian kum 1997 khan player angin SAFF Cup hi a lo châwi a, tunah coach ni chungin a champion leh a ni.

Tutenge inkhel?

India: Karanjit Singh, Mahesh Gawli, Nirmal Chettri, Climax Lawrence, Sunil Chhetri, Jeje Lalepkhlua, Gouramangi Moirangthem, Anthony Pereira, Rocus Lamare, Syed Rahim Nabi.

Afghanistan: Ata Yamir Ali, Djelaludin Sharityar, Faisal Safa, Ghulam Hazrat Abdul Hoddein, Hameedullah Yousufzari, Haroon Fakhrudin , Mohammad Esrafil, Yousef Mashriqi, Moqadar Faizullah, Sanjar Ahmadi.

First half-ah Afghanistan

Inkhel an ṭan chiah a, ‘home team’ India hi a bet zawkah an ṭang nghal. Afghanistan striker Balal Arezou a langsar a, Afghan player te an tlanchakin an cherang zawk a,Arezou hian a tir te-ah goal hlauhawm vawi 2 a nei nghal. India midfielder ten nidang an tluk lo a, India tlarhnunga bang rinawm ni ṭhin Mahesh Gawli leh Gourmangi Singh te inkarah Arezou a tlang leh phut ṭhin. India keeper Karanjit Singh chuan goal ngei tura lang vawihnih a dang bawk.

First half-ah chuan Jeje-a leh Chhetri te meuh pawh an langsar lo kher mai.

Red card leh goal 4

Half time-ah India coach in thu awmze nei a sawi tih a lang a, second half-ah India game a ṭha sawt. Team pahnihte an innawrtawn zak zak mai.

Minute 62 na a ni a, Jeje Lalpekhlua chu penalty box chhungah Afghanistan player in a tihtluk avangin referee chuan penalty a pe. Hei hi Afghanistan player ten an sawisel a, keeper Hameedullah Yousufzari chuan referee hi a nam (push) avangin red card pêk a ni. Afghan player pakhatin yellow card a hmu bawk. He red card hian sawizui a hlawh ve khawp ang le.

Penalty pêt turin Sunil Chhetri a rawn dingchhuak a, a vawikhatnaah pet goal mahse penalty box chhungah Nirmal Chhetri a lo tlanluh hman avangin pet nawn tir leh a ni a, a vawihnihna pawh hi a pet goal leh a ni. Chhetri hian tun tournament-ah goal 7 a thun a, kum 1997-a IM Vijayan-a record (goal 6) chu a khum ta chiah a ni.

Player ngah zawk India an khel ṭha chhunzawm a, minute 79 ah Clifford Miranda chuan India goal hnihna thunin, Jeje Lalpekhlua chuan penalty box chhung aṭangin minute 81 na-ah a pet goal bawk. India goal hnuhnung ber hi minute 95 a Sushilkumar Singh pet goal a ni.

Lalrindika Ralte pawh huntawp dawnah rawn lutin, a ball thiamzia vawihnih vel a rawn tilang bawk.

Inkhelh zawhah India coach Savio Medeira leh Sunil Chhetri te chuan red card in a puih thu an sawi ve ve a ni.

Mimal chawimawina

Top Scorer: Sunil Chhetri (India) – 7 goals

Player of the tournament: Sunil Chheri (India)

Player pawimawh Jeje Lalpekhlua

First half-ah Afghanistan an khelh ṭhat em avangin a langsar lem lova, second half-ah, a bik takin India in an pet goal hnua India player ṭha ber chu Jeje Lalpekhlua (leh Clifford Miranda) a ni awm e. A ball ken (hold) a ṭha a, dinglam leh veilamah ball ṭha tak tak a semchhuak. Goal nawrtu ber ni chungin India attacking move bulṭantu a nih chang a tam a, a taimakna hi hmuhhmaih chi a ni awm lo e. Indian player zingah Jeje-a aia ball control ṭha an tam awm lo e.

Tun tournament-a Sunil Chhetri chetṭhat zia kan hmu a, a strike partner hi Jeje-a ni kher lo se heti tak hian a che ṭha bik lo maithei. Jeje-a hi Mizo tlangval a nih avanga fak ta chiam kan ni lova, Chhetri dahhniam tumna pawh a ni lo. He tournament-ah hian Chhetri a langsar zawk tih chu phat rual a ni lova, mahse India team-ah hian Jeje-a aia Chhetri pawimawh bikna a awm lo.

“Mizo mipuite chungah lawmthu ka sawi e” – Jeje Lalpekhlua

Inkhelh zawhah Zofooty chuan Jeje Lalpekhlua biak nghal a tum a, mahse champion lawma an hlim em avangin kan be tlang nghal thei mai lo. Hotel-a an lêt tawh hnuah kan be thei chauh a ni.

Jeje-a chuan India rama inkhelh a, chak chu nuam a tih thu a sawi a. SAFF Cup an khelhna Jawaharlal Nehru Stadium chu nuam a tih thu leh, field chhung leh dressing room vel pawh a changkan thu a sawi. Rangers-a an trial chungchang pawh sawiin, tun dinhmunah chuan result la hriat loh mahse, an trial hian inrintawkna nasa tak a pekbelh thu a sawi a ni.

Inkhel ṭantirh lama Afghanistan an khelh ṭhat em avangin chak loh mai a inrin hman hial thu Jeje-a chuan zofooty a hrilh a. Bench aṭanga inkhel lo thlirtu Didika pawhin he ngaihdan hi a lo ṭawmpui thu a sawi. Semi final leh final-a goal thuntu Jeje-a chuan goal tam zawk thun thei a nih thu leh, a vanduai ṭhin thu a sawi. Game 5 ah goal 2 a thun a, thun tlem a inti viau mai. A theihna a rintawk zia a chiang mai awm e.

Tournament a hmachhawn vawikhatnaa champion pui nghaltu Coach thar Savio Medeira chu a lawm hle a ni tih Jeje-a hian a sawi a. Delhi Mizo ten a hmunah inkhel enin an ṭawiawm ṭha hle a, lawmawm a tih thu a sawi a ni. Tin, thuchiang tak la awm lo mahse, India player te chuan cheng nuaih 2 vel ṭheuh an dawng dawn niin a sawi bawk.

Mizo mipuite hnenah sawi duh a nei em tih zawhna chhangin, amah lo ṭawngṭaipui ṭhintu Mizo mipui zawng zawnge hnenah lawmthu a sawi a. Hun lo kal zel turah pawh lo ṭawiawm a, ṭawngṭaipui chhunzawm zel turin a ngen bawk a ni.

Zofooty chuan Jeje Lalpekhlua leh Lalrindika Ralte te a lawmpui tak meuh meuh a, champion nomawi an dawn belh zel theih nan duhsakna a hlan bawk a ni. Mizo kan ni kan hmel a ṭha, kan tum a sâng bawk si.