Jawaharlal Nehru Stadium, New Delhi-a khelh mek SAFF Championship pawh a hmawr kan bâwk hnai ta. Thawhlehni (December ni 6) khan Group B round hnuhnung ber khelh a ni a, Nepal leh Maldives te chuan semi final an lût tawh. Nepal leh Maldives te hian game 3 ah point 5 ve ve an hmu a, mahse Maldives hi goal difference-ah an ṭhat zawk avangin group winner an ni.

Nepal 1 – 1 Pakistan

Nepal leh Pakistan te inkhel hi hneh loh nei lo ve ve, chak hlauh chuan semi-final lut chiang thei ve ve an ni. Nepal hian minute 38 ah pe goal in hma an hruai a. Mahse minute 48 ah Pakistan captain Kaleem Ullah chu penalty box chhungah Nepal player in a ti tlu  a, referee chuan penalty pe in, hei hi Sama Ishfaq chuan a thun a ni.

Nepal hi FIFA ranking-ah 143 na niin Bangladesh an hneh hnuah Maldives nen an indraw a, Pakistan nen inhnehtawk lehin point 5 an hmu. FIFA ranking-a 174 na Pakistan hian an khelhpuite an draw vek a, point 3 an hmuh chu semi-final an luhpui zo ta lo a ni.

Nepal coach Graham Roberts a lawm a, “Semi final-ah hian tunge kan hmachhawn dawn tihah kan buai tehchiam lo. Plan fel tak nen he hmunah hian kan lo kal a, kan tum ang taka kan khelh theih kan beisei a ni. ” a ti. Semi final-a an hmachhawn tur, Group A te hi Nilaini-ah an inkhel dawn a, chawlh hahdamna hun an ngah bik tur chu an hlawkpui ngei a beisei thu a sawi bawk.

Maldives 3 – 1 Bangladesh

Anni pahnih hi Nepal leh Pakistan te result hresa a inkhel an ni a, an chak chuan semi-final lût thei ve ve an ni. Maldives hian bul an ṭan ṭha hle a, Ahmed Tariq  chuan minute 6 leh 17 ah a pet goal nghal. Bangladesh hian Saheedul Alam hmangin minute 30 ah goal 1 rawn khung ve mahse, man-of-the-match Ali Ashfaq chuan Maldives tân minute 70 ah a pet goal leh a, hei hi semi-final luh nan a tâwk ta a ni.

Maldives hian an game hmasa pahnihah Pakistan leh Bangladesh an draw tawh a, Pakistan an hneh hian point 5 hmuin Group B champion an ni a, Group A runner up nen semi-final-ah an intum ang.

Bangladesh hi FIFA ranking-ah 142 na an ni a, he tournament-a tel zingah chuan ranking sâng ber an ni. An ranking a sân ang aiin an khel ṭha lo hle a, Pakistan an draw ve tih loh chu point an hmu miah lo a, group B mawngphahah an awm.

Group A fixture

Group A round hnuhnung ber hi December ni 7 (Nilaini) ah khelh a ni ang.

Afghanistan vs Bhutan (3 pm)

India vs Sri Lanka (6 pm)

source: the-aiff.com