SALIBA CHUNGCHANGA ARSENAL CHÊT DÂNAH ST. ETIENNE LUNGAWI LO

Coupe de France final chu July 27, 2020 a khelh turin ruahmanna siam a ni a. Hetah hian St. Etienne leh PSG te an intum dawn a ni.

Arsenal in tun season ṭan dawna St. Etienne aṭanga €30m sênga an lakluh William Saliba chu a club hluiah hian season-long loan in an chhuahtir nghâl a, chutah chuan club pahnihte inremna an nei a. Chu chu Saliba hian St. Etienne tâna game 17 a start tlin chuan Arsenal hian bonus €2.5m an pêk belh a ngai a ni.

French defender kum 19 hi season ṭan hma aṭangin hliamin a tihbuai avang leh zai te hial a tawh avangin Gunners lam hian season khatah game 17 a start theih an ring chiah lo a ni maithei a, chumi avang chuan bonus pêk hi an intiam ni te pawhin a lang.

Tun season ah Saliba hian game 17 a khel tawh a, chuta game 16 chu a start a. July thla tawpa cup final khelh turah hian a start chuan game 17 tun season-ah a start dawn tihna a ni a, hei hi a thleng a nih chuan Gunners chuan €2.5m hi ASSE hnenah hian an pêk belh a ngai dawn a ni.

Mikel Arteta chuan Saliba chu a phu ang ngeiin cup final chu khel se pawi a tih loh thu sawi mahse Arsenal hotute lamin an sum hloh tur zât an hre kar niin a lang a, chutah chuan nizan khan Gunners hotute lamin Saliba hi ASSE a a loan hun chhung chu pawhsei loh ni mai se tiin Ligue 1 club hi an hrilh ta thut mai a, hei hi ASSE hotute lung a tiawi lo hle a, Arsenal hotute chêt dâna an lungawi loh thu thuchhuah an siam hial a ni.

Tichuan nizan thleng kha loan pawhseina hun a inhawn avangin tuna a lan dânah chuan Saliba hi vawiin aṭanga chuan St. Etienne a a loan hun chhung chu zovin Arsenal a lêt tura a puanthuah a têl a ngai dawn ta a. Cup final khel turin inbuatsaih tlut tlut mahse Coupe de France final-ah hian St. Etienne tân a inlan thei dawn ta lo niin a lang.

Get Football French News in Ligue 1 a kum 21 chin hnuailama center-back ṭha bera an thlan William Saliba hi tun season kal lai mêkah hian Europe a league lian zual panga – Premier League, Serie A, La Liga, Bundesliga leh Ligue 1 a center-back zinga minute 500 chin khel chinah foul nei miah lo awmchhun a ni a. Hetiang te avang hian kum 19 mi chauh la ni mahse Arsenal ṭantute chuan Emirates Stadium a a input luh hun an nghakhlel tawh hle.