Sane dinhmun chiang lo

Manchester City winger Leroy Sane chu sapram chanchinbu tam takin Bayern Munich nen inrem tawh angin ziak mahse City hian Germany international hi hralh mai an la tum lo niin BBC chuan a tarlang.

Kum 24 a upa Bundesliga a lo tal hrep tawh Sane hi nikum atang khan Bayern hian an lo thlem tawh a, tunah hian euro maktaduai 40 velin lei chhuah an tum niin an sawi.

Hetihlai hian City manager Pep Guardiola chuan a player pawimawh ni thin Sane hi chhuahtir mai a la tum lo a, an contract zawrh lo hnar fo tawh Sane hi tuna man tlawm tak a hralh ai chuan nakkuma a contract zo tur hi hman zawh tir law law a duh niin BBC chuan a tarlang.

Sane hi kum 2016 khan City hian Schalke atangin pound maktaduai 37 in an lei a, a club tharah hian bul a tan tha hle. Premier League nomawi vawi hnih leh FA Cup te chawi tawhin 2017/18 season phei kha chuan PFA Young Player of the Year atan thlan a ni hial.

Bayern nen sawi zawm a nih tirh, nikum FA Community Shield – a Liverpool an hmachhawn tumin minute 10 chauh a inlan hman tihin na takin a khup a tina a, vawiin thlengin khelmualah a la kir leh lo a ni.