#ZoFooty
Kuminah Santosh Trophy khelh a ni dawn.
All India Football Federation (AIFF) chuan state football inelna sang, Santosh Trophy Zone Qualifying chu kumin November 21 – 5 December chhunga zone hrang hranga khelh theih turin ruahmanna a siam.
Zone tin atanga qualify ten January ni 5, 2022 ațangin final round an khel leh ang. A khelhna tur hi AIFF chuan a la puangzar lo a ni.
Kan hriat țheuh angin 2019 – 2020 season ah khan Zone Qualifying khelh zawk vek tawh niin final round kha Mizorama khelh tura ruahman a ni a, Mizoram Football Association (MFA) leh Mizoram sorkar pawh nasa takin a in buatsaih hman a ni. Nimahsela, Covid-19 vangin khelh a ni ta lo. Mi tam tak chuan home advantage nen Mizoram kan champion leh theih mai ring an tam hman hle. 2020 – 2021 ah pawh Santosh Trophy khelh a ni ta lo.
2021-2022 ah erawh khelh tum ngei niin a chunga tarlan ang hian November ni 21 ațangin zone hrang hrangah qualifying khelh a ni ang.
Tun season (2021 – 2022) ah hian a landanin Mizoram Premier League (MPL) khelh a la nih hmel lova, MFA tan pawh Santosh Trophy team tur hi din a har viau mai thei a ni. Covid in ziaawm lam a pan a, MPL te khelh theih anih tak hlauh leh Mizoram Team thlan a awlsam phah thung ang.
AIFF chuan Santosh Trophy bakah hian Senior Women’s National Football Championship chu November 10-30 chhungin buatsaih a tum bawk a, 2022 January ațangin mipa leh hmeichhe tan age level tournament buatsaih a tum bawk.
