SANTOSH TROPHY : NAKTUKAH ENGKIM A CHIANG DAWN

Naktuk tlai dar 4 ah Goa khawpuia GMC,Bambolim ah Santosh Trophy vawi 71-na semi-final luh tumin Mizoram leh Railways an inhmachhawn dawn a, he inkhel pawimawhna em em chu a chak zawk zawkin semi-final an lut dawn a, an inhnehtawk a nih chuan Punjab an lut daih thung ang !

GROUP B DINHMUN

Final Round Group B ah hian Kerala in vawi thum khelhah point 7 hmu in semi-final an lut chiang tawh a, Punjab in vawi li khel tawhin point 5 an hmu. Mizoramin vawi thum khelhah point 4 hmu in Railways leh Maharashtra in khelh thumah point 3 ve ve an hmu bawk.

Naktukah hian team pahnihte hi an inhnehtawk a nih chuan Mizoramin Punjab nihrualin point 5 hmu dawn mahse goal difference ah Punjab an that zawk miau avangin 2014 champion hian an mutbu an tel a tul ang.

Chutih laiin Maharastra in Kerala lakah point thum an hmuh a, Mizoram leh Railways an inhnehtawk bawk chuan Kerala leh Maharashtra in semi-final an lut ang.

“Pathian zarah kan tho chhuak leh tur a ni” – Sanga

Mizoramin an match hnuhnung berah Kerala 1-4 zetin an hneh lo a, tla mai tawh tur a ngaih an nih lain midang result vangin an la him hram. Mizoram coach Lalsangzuala Hmar a tawngchhuak a,” Ka player te hi ka ringtawk a, tupawhin start se kan in tluk tlang a ni. Kan naute hian chak loh hi hreawm an ti a, Pathian zarah kan tho chhuak leh tur a ni,” tiin game ah pawh an insiamthat a beisei thu Zofooty.com a hrilh.

Mizoram team ah hian match hnuhnung ber a red card hmu Lalfakzuala a inlan thei dawn lo a, ani hi red card hmu lo reng pawh nise an match hnuhnung bera an petna hliam a vun nasat avangin a tlan thei lo a, vawiinah pawh physio in a enkawl nghe nghe. Hemi tum hian Mizoram winger hian referee hnenah appeal mahse inkhel thununtu hian ‘foul’ a hamsak duh lo a, an lawm lo hle niin Mizoram manager Lalthanzama Vanchhawng chuan a sawi.

“Thu lawmawm erawh inhliam vanga Kerala hmachhawn ve thei lo utility player V.Lalchhuanawma a dam tawh a, a khelh ngei a rinawm. Theihtawp kan chhuah zel a, Pathianin huntha min pek hi bawhpelh kan tum lo. Mizo mipuite min tawngtaipui turin kan ngen a ni,” a ti bawk.

Posted in Mizoram, Ramchhung.

Leave a Reply

Or