Santosh Trophy vawi 71-na khelh mekah naktuk tlai dar 4 hian Tilak Maidan Stadium, Goa ah Mizoram leh Punjab an inkhel dawn a. Group B match dangah Railways leh Kerala an inhmachhawn bawk ang.
Mizoram hian an match hmasa berah nikum finalist Maharashtra 3-1 in an hneh tawh a, Punjab hian Railways 2-1 in an hneh ve bawk.
“Match hmasa chak ve ve kan nih avangin inkhel pawimawh a ni dawn a, chak ngei kan tum. Punjab hi an lian tha a, chutih rualin kan coach Lalsangzuala Hmar hi kan ring tawk a, a game plan hi kan chakpui ka beisei,” tiin Mizoram manager Lalthanzama Vanchhawng chuan a sawi.
Mizoram team ah hian inhliam vanga Maharashtra hmachhawn ve thei lo goalkeeper H.Lalremruata leh defender Lalramhmunmawia te an la dam chiang lo a, striker Lalrammuanpuia pawh a inhliam vangin a inlan theih a beiseiawm lo.
+ There are no comments
Add yours