SANTOSH TROPHY : SEMI-FINAL AH MIZORAM

Santosh Trophy vawi 71-na Group B match vawiin tlaia khelh zawh takah Mizoram chuan Railways 5-1 a hnehin semi-final an lut.

He inkhelah hian Mizoram tan F.Lalrinpuia chuan goal hnih thunin V.Lalchhuanawma, Lalrinchhana leh Lalsangbera te’n goal khat theuh an thun bawk.

Tute nge khel ?

Kerala laka an mualpho hnuah insiamthat tum Mizoram coach Lalsangzuala Hmar in a team chhawpchhuah hnuhnung ber atangin mi pasarih ngawt a thlak a. A vawikhat nan Mama aiah Lalmuanawma chu siban nghaktu ah hmangin Zautea aiah Malsawma, Lalhlima aiah Ahmuntea, Mamawitea aiah Chhuantea, inhliam Fakzuala aiah Sangbera, double yellow card vanga inlan thei lo Israela aiah Biaktea dahin Apuia thlak nan Rammawia a hmang bawk.

Mizoram XI : (4-4-2)
Muanawma; Malsawma(U-21), Ahmuntea(U-21), Rinchhana(C), Dinliana; Biaktea, Chhuantea, Rinchhana(U-21), Sangbera; Rammawia, Valpuia

Mizoram an tla !

Team pahnihte’n point thum an hmuh theih chuan semi-final an lut dawn tih rilru a dah chungin inkhel an tan a, an inbeitawk nghal hle. Minute 8-naah Mizoram striker F.Lalrinpuia’n (Valpuia) box chhung atanga a thelh leh right-back Malsawma cross Electric Veng tlangval Lalrinchhana tauh luh loh te chu a uiawm hle. Minute 24-naah inhliam vanga Kerala hmachhawn ve thei lo ONGC player V.Lalchhuanawma’n halfway line vel atanga ball changin a khalh phei zel a, box pawn atangin mawi takin a pet lut. GMC Bambolim ah ‘kawr var ha’ Mizoram team an lam. Utility player Chhuantea hian Maharashtra lakah goal a lo thun tawh bawk a, tun hi a goal hnihna a ni.

Railways lamin an si phur sut tumin Mizoram tlarhnung a dingte an rum thaih ve reng a, keeper Lalmuanawma ball man sual zarah goal an thun teuh hle. An innawrtawn zak zak karah minute 38-naah Valpuia cross chu winger Lalbiakhlua’n keeper chauh a hmachhawn tawh tihah goal ah a chantir zo lo. Minute 42-naah erawh Mizoram an chesual a, ‘counter attack’ a an nawr tur tisualin Railways lamin ‘throw-in’ an hmu a, hei hi hmang tangkaiin veilam sir atangin Mizoram defender te an vawrh khum a, j.no.10 Rajesh Soosanayakam chuan an si phurh sut nan mawi takin a lo tauh lut. 1-1 niin first half a tawp zui.

Inkhel dangah Maharashtra in Kerala lakah 1-0 a hma an hruai mek avangin Mizoram leh Railways hi an inhnehtawk a nih chuan an tla ve ve dawn a, chak zawk an awm erawh chuan point thum hmu zawk zawk chu Keralah hnungzuitu tur an ni ang. Thil danglam thlen tir nan minute 45 an la nei.

Pathian zarah an tho leh !

Inkhel tan hma in Mizoram coach Sanga hian,”Pathian zarah kan tho leh ngei tur a ni,” tiin Zofooty.com a hrilh a, manager Zama’n Mizo mipuite tawngtaipuina a ngen bawk.

Second-half an tan a, dan pangngaiin Mizoramin ‘half chance’an neihte an hmang tangkai hleithei lo. Minute 50-naah Dinliana pet keeper in a dan hman chu a uiawm hle a, hemi hnu hian Biaktea’n hun tha an bawh pelh vek bawk nen, stadium chhunga Mizo fans awmte’n sana an en tan.

Mizoramin nawr chhunzawm zelin minute 59-naah veilam atangin Rammawia’n ball changin Railways defender te ‘offside trap’ siam sual karah Rinchhana a rawn pit zawk a, goal ah chantir nghal thei mahse mahni hmasial lo takin Valpuia a pe phei a, 2014 final a Railways laka goal lo thun tawh Valpuia’n awlsam takin a pet goal. Mizoramin substitution siam zuiin Lalrammawia aiah forward Jesse Laldinpuia an luhtir a, goal tam zawk thun an tum tih an lantir.

Beisei ang ngeiin Mizoramin inkhel an thunun chhunzawm a, minute70-naah Mizoram Police forward Sangbera ball pek nalh zet chu midfielder Rinchhana’n a zar zo in goal – ah a pet lut. Inkhel boruak en in Mizoramin an ke veilamin semi-final an rap tawh a, chutih laiin minute 20 lai a la awm avangin thil danglam thei a la ni.

Si hnih phur tawh Railways in thawh chhuah leh tumin tan khawh mahse an vanduaina a kal tluang a, minute 76-naah Valpuia penalty hlawhchhuah chu Sangbera’n thunin 4-1 a ni ta ! Dawrpui Veng tlangpui Sangbera hian a celebrate pui hle a, mipuiin an lawm hle. Republic Veng fachuam Valpuia’n a duh khawp a la hmu lo a, minute 83-naah substitute Ramfangzauva cross chu Valpuia hian ‘cool’ takin goal ah a chan tir a, keeper a che eih lo. Hun tawp thlengin goal a luh belh lo a, Mizoramin 5-1 in hnehna an chang ta a ni.

Enge an sawi ?

ZoFooty.com chuan Mizoram manager Lalthanzama Vanchhawng a pe bawp nghal a, “Kan chak chhan ber chu Pathian vang a ni. Qualifier ah kan chak a, Captain NM Gupta Tournament ah kan champion bawk avangin kan naute hian chak loh hi an thiam lo a, Kerala in min sawp kha an la na a, chak duhna thinlung tak tak nen khelmual kan pan a ni,” tiin a sawi.

“First-half ah kan chiai deuh a, half-time laiin kan infuih nasa hle. Second half-ah erawh dawhtheihna nei turin kan infuih nasa a, kan chak phah ta niin a lang. Goa Mizo te’n min tawiawm tha em em a, tin, result chhia kan neih lai pawhin MFA in tha takin min support reng a, an chungah lawmthu ka sawi a ni,” a ti bawk.

Group B ah Mizoram hian ‘head to head’ ah Kerala an phak loh avangin pahnihna an ni a, vawi 4 khelhah vawi hnih chakin tum khat ve ve draw leh chak loh an nei. An khingpuite lamah goal 9 thunin final round group stage a goal thun hnem ber an ni a, an lamah goal 6 chhuahin an goal difference chu 3 a ni.

Mizoram hian March ni 23 tlai dar 3 hian semi-final ah Santosh Trophy a record nei tha ber West Bengal an hmachhawn dawn a, Bengal hian final round ah an khingpuite tum thum hnehin vawi khat an draw a, goal an la chhuah lo thung. Semi-final dangah Kerala leh Goa an inhmachhawn ang a, final hi March ni 26 tlai dar 6 ah khelh a ni ang.