Name: Islam Feruz
D.O.B: 10 September 1995 (Age: 16)
Height: 1.63 m (5.3 ft)
Weight: N/A
Natural Position: Striker
Secondary Position: Right-Winger, Left-Winger
Preferred Foot: Right
Nationality: Scotland
Strengths: Speed, Strength, Technique.
Weakness: Defending, Aerial Ability.
Current Club: Chelsea FC
Current Value: Unknown
Estimated Transfer Value: Unknown

Hollywood story ang deuh mai a ni. 2001 a ram buai Somalia atangin kum 6 mi anihin Scotland ah an pem a, chutah chuan Scotland a rawlthar beiseiawm ber te zinga mi a rawn ni chho leh a, “the Scottish Wayne Rooney” tih hming te an put tir hman hial a ni. An pemluh atanga kum 10  a liam tihah Barclays Premier League club hlun Chelsea chuan Celtic youth academy a awm mek Islam Feruz chu an lalut a, a club hmasa te hi an thinrim hle a, he thil avang hian club pahnihte pawh an buai phah ta hial a ni.

Feruz te chhungkua an rawn pemluh hian dan ang lo a lut an nih avangin thawn let tur an ni a, mahse chu chu Tommy Burns, khatihlaia Celtic Youth Development enkawltu chuan a talent thatzia a lo hmu a, Foreign Office chu awm tir turin a dawr thei hram a ni. Tichuan Feruz hian hma sawn zelin Burns hian a hmusual lo a ni tih a lantir zel a, Scottish U – 17 team ah kum 14 mi lek anih laiin an koh a, a game hmasa 7 ah goal 6 a thun nghal a ni. Nikum khan Celtic U-19 star player niin Senior team ah hlankai nghal a ni.

Celtic hian professional contract ziahpui an tum laiin Europe club lian ho an rawn lang tan ta a, Chelsea chuan midangte lehpelin September thla khan karkhata £2,500 hlawh turin contract an ziahpui ta a ni. Celtic lam hian compensation a £250,000 an hmuh turah chuan an lungawilo hle a, an player hi hei ai hian a la hlu zawk dawn tih an chiang hle a ni.

Team Manager Neil Lennon phei chu a thinrimin tihian a ti a,” A tan thil tam tak kan ti a, ram buai kar atangin kan la chhuak a, in leh lo nuam takah kan dah a. Club hian a tan theihtawp a chhuah a, amah leh a chhungte theihtawpin kan enkawl a mahse a rilru lak pen a ni tlat mai. Thurawn dik lo a dawng a niang e, hei hi football vang ngawr ngawr chu a ni thei lo a ni.” A Agent erawh chuan, ” Islam a lungawina tak chu Chelsea hi a ni. An youth set-up a tha hle a, tin, Premier League a khel thei a ni dawn hi Pathian malsawmna tak tak a ni. Celtic chungah amah leh a chhungte tana an tih zawng zawngah lawmthu a sawi a ni.” a ti a ni.

Hetiang khawpa sawizui tur chuan mi engemaw tak chu nih ngei a ngai a ni, han thlir chiang dawn ila.

STRENGTHS: 1.63 meters chauha sang ni mahse Feruz hian tharum a ngah em em a, hei hian defender tharum ngah leh rothap tan pawh dan a ti harsa hle a ni. Tin, a tlanchak hle a, a acceleration leh pace a tha in a technique, dribbling skills leh close control a tha tel hle bawk a, hei hian a natural position bakah a sirah pawh a ti hlauhawm hle a ni. A ke dinglam hi hmang ber mahse a pahnihin a shoot thei ve ve a, tin, an tehkhin thin Wayne Rooney ang bawkin midfield a tlan let a ball lakluh nuam a ti em em bawk a ni.

WEAKNESS: Talent nei tha hle mahse la inzirna tur a tam a, a experience a la tlem hle a, senior team experience pakhatmah a la neilo a ni. A passing game, tactical awareness leh defending te inzir a ngai hle bawk a ni. Tin, tharum ngahin tlanchak  mahse a pa len loh avangin boruakah a hlauhawm loh hle bawk a ni.

MENTALITY: Sawi zuina nei hnem hle mahse Islam Feruz hian footballer tha tak ni turin rilru a nei niin a coach te chuan an sawi a, Celtic chhuahsanin sawisel hlawh viau mahse hei hian a inkhel a tibuai lemlo a ni. Professional tha ni turin eng ang rilru nge a put  chu hriatthiam la nilo mahse a huaisen a, sawiselna karah pawh a zam mai mai lo tih a tilang a ni.

TUNA A DINHMUN: Kum engemawzah kalta khan Slobodan Rajkovic leh Scott Sinclair te chu Feruz ang rual an nih hian Chelsea chuan an “Future Star” tur te tiin an la lut a, mahse Chelsea senior team ah rawn chuang chhuak zo lovin tunah chuan an chhuahsan tawh a. Tin, star players tamna leh player naupang talent tha tak tak Romelu Lukaku leh Daniel Sturridge te awm tawhna team ah hian first team football chu chan a awlai vaklo ang tih a hriat mai a ni.

Tunah hrih chuan Feruz hian Chelsea youth system ah hmsawn zel phawt a mamawh a, chutah kum hnih  hnu velah emaw tawnhriat ngah lehzual nan a loan a chhuah a mamawh bawk a ni. Hetia a tih chuan khawvela team tha ber te zinga mi ah hmun chang turin a chuh ve thei dawn a ni. Manchester United a Danny Welbeck leh Tom Cleverley te hi entirna tha tak an ni awm e.

A eng kawng pawh chu lo zawh ta se, he kum 16 mi chan chhe tak atanga dinhmun duhawm a awm chho hi football khawvel hian nakin lawkah chuan a hming kan la hriat fo ngei a rinawm a ni.