Real Madrid kan sawi chuan Cristiano Ronaldo a lang nghal a, Pepe, Benzema, Ozil leh Casillas te ho an lang zui ṭhin. Barcelona kan tih chuan rilruah Lionel Messi a rawn lang vat a, Xavi leh Iniesta te, Dani Alves leh David Villa te an lan chhunzawm bawk. Anni ho hi club pahniha player pawimawh, Real ti Real a, Barca ti Barca tute an ni a, team khata khel ho rau rau ah an langsar bik a tih ngam.

Gonzalo Higuain (Real Madrid) leh Pedro Rodriguez (Barcelona) te hi lar lo chu an ni hauh lo a, mahse an teammate thenkhatte ang em em chuan an langsar lo deuh. Anni pahnih hian an club an zawm hnua season bul an ṭan fuh ber kum an hmang mek a, La Liga a an khelh hnua an ‘form’ lai ber an hmang mek a ni.

Real goal thun khawl Higuain

Argentina striker Higuain hi tun season-a Real Madrid top scorer a ni mek. 2012/13 season ah hian Real Madrid tân match 5 khel tawhin goal 4 a thun der tawh a, kum 2007, January thlaa Real a zawm hnua season bul a ṭan ṭhat ber ṭum a ni. Higuain hi tun season-a La Liga match hmasa ber pahnihah pet goal ve ve in, Cristiano Ronaldo, Wesley Sneijder, Raul leh Ronaldo (Brazil) te hnuah hetiang ti leh thei hmasa ber a ni nghe nghe.

Supercopa 2nd leg ah Barcelona an hneh ṭumin tun season-a a goal hmasa ber a thun a, La Liga ah pawh Valencia, Getafe leh Granada lakah a pet goal chhunzawm ta zel a ni. A club ang in Real Madrid in season bul ṭan ṭha lutuk lo mahse Gonzalo Higuain tân chuan season duhthusam a la ni rih e.

Club leh ram tân Pedro a pui

Pedro Rodriguez kan hria a, 2009 ah beisei phak baka rawn khel ṭha in Barcelona attacking position 3 zinga a dinglam chu a ta neih hman a. Season hmasa-ah hliam tenau leh khelh ṭhat tawk loh vangin Barcelona tân a khel tam lutuk lo a, mahse season tâwplamah ropui taka rawn lêtin, club leh ram tan a thawhhlawk viau a, Euro 2012 champion Spain team ah pawh a tel a ni.

Season hmasa a khâr ang deuh chiahin tun season bul a ṭan a, Barcelona player ṭangkai a nih piahlamah Spain tân pawh a che ṭha hle. Season thara a match hmasa ber pahnihah goal a thun nghal ve ve a, Spanish Supercup 1st leg a Real Madrid an hneh ṭumin goal khat a thun a, La Liga a Real Sociedad an sawp ṭumin goal khat bawk a thun. Kar hmasa Zirtawpni-a Spain in Saudi Arabia an sawp ṭumin goal hnih a thun leh a, ti hian tun season ah goal 4 thun tawhin, Barcelona a a khelh hnu-a season bul a la ṭan fuh ber a ni.

Ronaldo leh Messi te ṭhat zia kan hria a, keini ai mahin an tumpui club dang manager leh player ten an hrechiang awm e. An pahnih chauh pawh uluk taka vên an ngaih tawh laia midang an lo ‘form’ ve lehzel chuan ven hneh an har tawh em em a, lehlam tân dan hleihtheih an ni tawh ṭhin lo a ni.