SEASON THAR LO AWM TUR ATAN NAPOLI AN ṬANG

Serie A a 6-na ni mêk Napoli chu season thar lo awm turah dinhmun ṭha zâwk luah tumin hma an la mêk a, chumi atan chuan Lille player pawimawh pahnih Victor Osimhen leh Gabriel Magalhaes te lakluh an tum.

Nigerian forward kum 21 mi Victor Osimhen hian tun season Ligue 1 ah tihtâwp tâkah khân Lille tân game 27 khelin goal 13 a khung a, assist vawi 5 a nei bawk a. Tin a teammate Brazilian center-back Gabriel Magalhaes hian game 24 khelin goal khat a khung ve bawk a. Kum 22 mi Gabriel hi Ligue 1 a center-back ṭha berte zinga mi a ni.

Lille player pahnihte manah hian Napoli chuan €100m chuang an thehchhuak phal a, tin player pahnihte hi kum 5 daih ve ve contract ziahpui turin an inpeih tawh bawk.

Nimin lam khân Osimhen hian Napoli zawm turin Naples khawpui a thleng tawh ni a hriat a ni a, Gabriel erawh hi chuan Naples hi a la pan chiah lo a nih hmel.

Heng player pahnihte bâkah hian RB Salzburg midfielder Dominik Szoboszlai chu Napoli hian lakluh an tum bawk a, Hungarian kum 19 hian Austrian Bundesliga ah season ṭha tak hmangin game 25 a khelh tawhah goal 7 khungin assist vawi 13 lai a nei tawh a. Austrian club hian €25m bawr chuan an hralh phal niin khawthlang lam chanchinbumite chuan an sawi a ni.