Karhmasa Inrinni(22/04/2012) zana Real Madrid-te’n Barcelona 2-1 a an hneh ṭum khan hemite pahnih inkhel hi miin an en tam theih zawk nan tiin Sevilla leh Levante inkhel hi an tih tlai phah a, hei vang hian Sevilla fans lungawilo chuan tennis ball ṭhahnem tawk tak ground-ah an vawmthla ta ur ur mai a ni.

Match ṭan a nih veleh mual neitu fans lam hian tennis ball a tam a tam mangkheng chu anmahni goal lamah an thehlut a, stewards lamten thenfai tum ṭhin mahse fans lam chuan an thehthla uar sauh sauh thung. Mi ṭhenkhat chuan banner lian tak rawn lekchhuakin “Inkhel titawp ru, Mourinho a ṭawng a nia” tiin Jose Mourinho-a post-match press conference neihlai awm vel lai takin el takin an rawn tarchhuak bawk.

Engatinge tennis ball kher kan ti maithei? Kum 2 kalta khan Basel fans-te hian Luzern Club nen an inkhelh dawn ṭumin hetiang hian an lo che tawh a, a chhan chu ATP Basel Tournament awm lai a ni a, Novak Djokovic leh tualchhung Tennis Player Roger Federer-te inkhelh dawn vangin football match zawk hi an lo tihkhawtlai phah tawh a ni. Tuna Sevilla Fans-te hian tennis ball an rawn thehthlak ve vakna chhan hi Tennis Match nena inkungkaihna nei lem lo mahse game an tih khawtlai theihna tur ni bera an hriat vang a nih a rinawm.

Ball hi thenfai a nih hnuah Sevialla leh Levante-te hian an inkhel tluang tlakin an chhunzawm a, 1-1 in an inhnehtawk a ni. Hetihlai hian Mourinho chuan Barcelona an hneh zawh hnu lawkin Media lam laka a lungawi loh ve tho vangin Press Conference neihnaah a aiah a assistant Aitor Karanka a tir nghe nghe a ni.