Sevilla leh Bengaluru United thawk dun dawn

La Liga club Sevilla leh FC Bengaluru United te chuan kum 5 chhung thawk dun turin inremna an ziak.

An inremna ang chuan club pahnihte hian Karnataka – ah football school intawm an din ang a, Sevilla hian kawng hrang hrang – management, analysis, talent spotting, player development leh sports technology – a Bengaluru United mamawh te a tumsak dawn bawk a ni.

“Kan club tan chuan he inremna kan ziak thei hi a lawmawm em em a. India te ang ram liana kan than theihna turin he inremna kan ziak thei hi a pawimawh em em a ni,” tiin Sevilla President Jose Castro Carmona chuan a sawi. Bengaluru United neitu Gaurav Manchanda pawhin an inremna vanga a lawmzia sawiin,” Kan rama Sevilla kan seng lut thei hi hun chhinchhiahtlak tak a ni a, hei hian Indian football – ah hmasawnna a thlen ngei ang,” tiin a sawi.

FC Bengaluru United hi kum 2018 – a din niin tunah hian Bangalore Super Division – ah champion an ni mek a ni.