Inkhel tantir atanga a tawp thlenga inkhel thunun Manchester City tan Kevin de Bruyne chuan veilam sir atangin Fernandinho ball pek chu a lirin Petr Cech-a khawih phak lo chiah chiahin a thun a, City hian goal thunna remchang nei zui nual mahse an hmatawng David Silva, Sterling leh Sane te chet nawi zan niin awm ang lo leh ho lam tak takin an hun tha neih an khawhral!!
Arsenal hian first half tawp hma lawkin goal a thun apianga deuh thaw a milar thih thawmin a zui thin Aaron Ramsey hmangin goal thunna remchang nei mahse, chep tak kara a pet chuan City keeper Ederson-a kut dinglam a paltlang zo lo.
Second half tir lamah Gunners left-back a laia ding tura pawhchawp Monreal chesualin he match a cross chhe thei tak Raheem Sterling titluin penalty a chawi a, Aguero chuan Petr Cech-a dive lohna lamah petin ban chhung lam fuh mah se goal-ah a chang a, City tan goal 179 thun tain City tana goal thun tam ber a nihna a belhchhah.
Arsenal in an hneh than tak club laka kutthlawn tawrh duh lovin an nawr a, minute 65-naah Aaron Ramsey chuan substitution bench atanga lut Alexandre Lacazette pein French striker hian a ke dinglamin chiang takin a thun.
Inhneh tawk taka an inbeih tawn laiin linesman in tihsual lian tak a nei; Arsenal in offside trap an siam chhungah David Silva a tlazep a, ani hian offside position-a awm chunga an ball dawn chu lain bench atanga lut Brazilian striker Gabriel Jesus tan a pe a, goal thumna an thun! TV replay en pawhin Silva leh Jesus te hi an offside ngei tih a chiang. Mahse, linesman in a phar miau loh avangin match referee Michael Oliver tan pawh lo ham ngawt chi a ni lo (dem tur kan zawng dawn a nih chuan referee ni lovin linesman kha a ni dem tur chu).
A mamawh ang player lakhawm thei Pep Guardiola enkawl Manchester City in result tha an neih chhunzawm zel a, Carabao Cup a penalty a Wolverhampton Wanderers an hneh chhiar telin a zawnin inelna hrang hrangah vawi 15 an chak ta! Premier League-ah hma hruai chhunzawmin zanina an hneh tak Arsenal nen point 12 laiin an inthlau tawh.
Season hmasa City aiin tun season-a City hi an tha zawk a, an chetranna leh an ball thiamna chhawrin counter attack-ah an hlauhawm em em a, an hmatawng Aguero, Sterling, Leroy Sane leh De Bruyne te inkawprem tak sawithiah hi thil har tak a ni. Gunners lakah an hmatawngte nikhua deuh se chuan goal 5 chuang thun thei an ni. Hnehna an chang kha a mak lova, an khingpuite lakah Yellow card tih chauh lohvah chuan kawng engkimah an chungnung.
Arsenal erawh Wenger-a hnuaiah a ni telin an chau telh telh niin a lang a, midfield-ah tunlaia khel tha lem lo Xhaka bawkin bul tanin ball chelh rei thei Wilshere chu minute 78-naah luhtir chauh a ni a, an striker tha ber Lacazette pawhin minute 56-naah mual chhung a dai ve chauh!
Midfielder fing leh remhria (Fabregas leh Cazorla te ang chi) an neih loh bakah defensive midfielder rintlak an neih loh avangin midfield leh defence inkarah awl a tam a, City player ten an nawr chilh (close down) zung zung si avangin defence atangin ball a chhuak thei lo.
Arsenal hian manager thar nge an mamawh player thar tih hi zawhna lian tak a ni chho zel rih dawn niin a lang.
Statistics
Manchester City <> Arsenal
58% Ball Possession 42%
9 Shots 6
5 On Target 3
5 Corners 5
15 Fouls 15
1 Yellow Cards 6
+ There are no comments
Add yours