Khami Ni, kum 25 kalta atang khan he khawvel a mihring awmzat pawh tluklehdingawn hnih chuangin a pung tawh !!! Mahse tichung chuan Sir Alex a zawng a la ngai reng e. A la ngai rengna lai erawh thil pakhat ah chiah a ni thung. Hun leh ni ten khawvel leh football a her danglam zel rual hian football inthlak danglam zel pawh a inthlak pui ve thei zel tlat si a ni. Mahse “A LA NGAI RENG E” ka rawn ti lawi si… “Eng nge a la ngai reng na chu???” tia zawhna kan zawh chu tuipuiral tawngkam khat in a chhanna chu… “GENIUS”.

Ni 6 November, 1986 a Manchester United manager a ruat tur hi Scottish pachal Alexander Beaton Ferguson leh Elizabeth Hardie fapa upa zawk, Sir Alexander Chapman ‘Alex” Ferguson ni turin ni 31 December 1941 khan a rawn piang a ni. A personal life lam luhchilh dawn lo mah ila a nupui Cathy Ferguson hian 2002 khan muthmunah thumal “tlem” sawi lo ta se he special hi kan chhiar lo ang.

A Playing career hi Queens Park tan Amateur anga bul tanin kum 16 mi anihin a debut match a khel a, a vawikhat inkhelhna hi ani chuan “Nightmare” tiin a sawi nghe nghe a ni. Hemi ni hian 2-1 in chak lo mah se goal a thun nghal a ni. Tichuan kum 17 chhung Professional football a khelh chhung hian Scotland a chhuahsan lem lo a, amaherawhchu khatihlaia Scottish club hlun zinga mi Dunfermline Athletic, Rangers leh Falkirk tan te a khel hman a ni. A Record pawh hi a nep lem lo, League game 317 ah goal 170 a thun a ni.

Sir Alex a’n kum 25 Manchester United a enkawl champha ah hian a professional record emaw, a managerial record emaw, a trophy lakzat, a elpui manager ten enge an sawi tihte ni lo lam deuh, hetiang zawng zawng midangin an sawi theihna atana Sir Alex a chungchanga pawimawh ber tih theih lo thlir ila.

A “Daih rei” hi chu tu pawhin hahipa an fakna a ni a, tin, fak phu pawh a ni. Kum 25 tehmeuh football team enkawl chu hlawhtling emaw tling lo emaw a ropui hrim hrim… tam tak chuan sorkar hna chhete pawh chutiang chen chen kan thawk peih hleinem le!!…mahse he kum 25 a enkawl theih tiropui lehzualtu leh manager dang a elpui zawng zawng tena an chung enna bik chu hei leh chen team tha ber ni tura kumtin a bei ziah thei hi a ni. Hungarian Coach hlawhtling Bela Guttman, Benfica ropui vanglaia European Cup vawi hnih lakpuituin ” a season 3 na hi chhiatna a ni” tiin a lo sawi tawh a ni. Mahse hei hi Sir Alex hian a hre ve lo emaw tih mai turin tunah a “decade 3 na” a hmang mek a, hlawhtlinna umin a la koham tulh tulh a nih hi maw! He a quality vang hian a ni Marcello Lippi, Carlo Ancelotti, Jose Mourinho, Arsene Wenger leh Pep Guardiola ten mak leh ropui tia an lo fak mawlh mawlh tawh chu.

Sir Alex a thawhrimna bakah hian enge midangte aia a danglamna bikna? Nakin zela coach dangte tana entawntur enge a hnutchhiah? Engtin nge historians ten football a thlak danglam an la tih ang?

A hlawhtlinna piahlamah hian Sir Alex hian thuhnuairawlh takin thil a thlir thiam em em a. Tin, a Coach ngaihsante tih anga kalpui zel a tum lo leh ama thlir dan bik a nei te hi a tangkaipui a ni. Thil tam tak Sir Alex hian he Manchester United a a kalpui hi a awm a. A “mind-game” a awm a, tin, a “hairdryer” treatment khawvel ina a hriat te bakah stoppage time hi “United Time” tia sawi anihna chhan te pawh a awm. Hengte hi Sir Alex-a bik anihna chu a ni chiang a ni, amaherawhchu enge a technical qualites lam hi han thlir ve ta ila.

Tactician ang zawng chuan Sir Alex hi thil thar/idea thar hmangtu leh hmuchhuaktu a ni lem lova, amaherawhchu eng dinhmun atang pawh a insiamrem thei leh chak loh atanga a inzir thiam em em hi coach dangten an tluk lohna a ni.

United a enkawl tirh khan English Football chu a tlachhe em em a, Heysel Disaster vangin  European football ah kum 5 chhung banned a ni a, hei hi an football in a tuar em em  a ni. 1970’s vel khan Bob Shankly, Bob Paisley leh Joe Fagan te khan Liverpool ah English football thar an hmuchhuak a tihtheih awm a, Europe-a an chak lohnaah te rawn inzirin technical football, possession leh dawhthei taka opposition defense thiah a innghat chu an rawn chhawr tan a ni. He style hi Brian Clough chuan ropui taka hmangin English Football a chawisang anih kha.

Ferguson khan United a enkawl tan khan a tum ber chu Title laklet kha ni mahse, a thil tum thui zawk leh fakphu zawk chu United England ah mai ni lo Europe ah kumtin mai a hlauhawm ber leh a roreltu pawl ni thei tura dinhmun tha a hlankai hi a ni.

Khatia English Football Banned a nihlai khan European Football ah coach Arrigo Sacchi tactic thar a lo duang chhuak daih tawh a, Sweeper leh man-marking bansanin team tangrual, unit khat anga defend a pressure lehlam pek chu a lo hmangthiam daih tawh a, heihi English Football in a lo la hre ve lo a ni.

Tichuan 1994 ah Johan Cruyff a Barcelona in 4-0 a United an sawp tum khan Sir Alex chu chakloh atangin a inzir ta. Khatihlaia a defender Steve Bruce phei chuan khami kha 4-4-2 United tana a tawpna niin ka hria a ti hial a ni. Sir Alex chuan midfield ah mi pakhat dah belh emaw striker pawh let emaw in a experiment chho ta zel a, tihian a inzir chho a, team flexible tak leh eng dinhmun leh eng opposition lakah pawh insiamrem zung zung thei a dinchhoh phah ta a ni. Hei vang hian United team chu an fit sawt a. Tin, counter attack-ah an hlauhawm ta hluah hluah bawk a ni.

Club tam takah chuan players ten Manager ngaihtuahna an tih hah laiin, United ah erawh chuan Sir Alex a ngaihtuahna ten players te a ti hah thung a ni. Khatihlaia Europe roreltu Barcelona leh Milan te ngam thei tur team a mamawh tih a hria a, chu ngei chu tiin, team thar 1999 a champion tur kha a din ta a ni. Hemi mai bakah hian a la inzir zel cheu! Louis Van Gaal a Ajax team movement fluid lutuk te, Ottmar Hitzfield a Dortmund leh Munich team tactical discipline tha lutuk atang ten a la inzir belh zel bawk a ni.

Chutah tak chuan anni pahnih aia a ropuina ni ta chu hei hi a ni – Sacchi, Cruyff, Capello, Lippi, Van Gaal, Hitzfield, Vicente del Bosque leh Mourinho te chuan team ropui tak an din theuh a, mahse chu an team din chuan chuai hun an tawng anih loh pawhin an ropui luatah beiseina sang tak mipuite siamin chu beisei an phak leh si loh avanga ban an ni. Wenger hian United lehpel thei team vawi hnih chu din tawh mah se Sir Alex hian a rawn lehpel leh zel tho a ni.

Hei tak hi Sir Alex a ropuina chu a ni. A ruala team pahnih a enkawl thei tlat hi a ni. Mourinho chuan tuna a team ah theihtawp chhuahin engkim a pe a, hmalam thlir thui lutuk a nei lem lo tiin a sawi theih. Wenger erawh chuan hmalam thlirin tun huna a team lama ngaihthah tiin a sawitheih bawk.

Tichuan tunah enge Sir Alex hian a tih leh chuan ang??? Tunah hian team thar din leh turin a inbuatsaih mek a ni. He team innghahna tur hian player naupang beiseiawm tak tak leh talent nei tha tak a enkawl mek a, heng players rualho hi tun kum nga atanga kum 10 thleng pawh a ni mah na(???) rorel thei tur team lungphum pawimawh ni turin a chher leh mek anih hi. Rorel leh tura a hmabak awmchhun chu Rome ah leh Wembley ah kan hmuh kha, Pep Guardiola enkawl Barcelona lehpel thei tur team a duang thei anih chuan he a chak duhna “Hunger” pawh hi phuhruk a ni tawh mah na..???

Hei hi Sir Alex Ferguson “The King Of Old Trafford” a Manchester United chu, football khawvela “Darwin’s Theory of Evolution” tlukpui chu. Hei hi chu ti lutuk a ni lo, Sir Alex-a idea hi a ngai reng lo, a inher danglam zel si a. Damchhuak turin a in “evolve” ve lo, CHUNGNUNG turin a in “evolve” zawk a ni.

Vawihnih mai nilo, vawithum lai mai team ropui a dinte hi han thlir ila:

The Class of ’94

He era a first choice XI (1st choice mi 11 te bik khan an khelhho apiangin) te hian 93/94 “Double” season khan 100% record an nei a ni. Season ruk chhung hmun hrang hrang atanga inla khawmin he team hi a din a. Peter Schmeichel, Steve Bruce, Pallister leh Denis Irwin te kha tlarhnung nghet lutuk an ni a, Paul Parker khan fullback ah a thawhhlawk em em bawk. Keane leh Ince ten alaiah midfield nghet leh creative Bryan Robson an a vanglai taka a duh ang thal a a chet theihna tur an rawn thawh a. Tin, Giggs leh Mark Hughes te kha Home-Grown talent niin Kanchelskis kha Russian export a ni. Chuan Eric Cantona kha he team tha team ropui a siamtu a ni.

The All Conquering Class Of ’99 OR Fergie’s Fledglings.

“If you’re good enough, you’re old enough!!” he thupui hmang hian a rawlthar te a chher hriam a, a hmaa a team ten chuai lam an hnaih avangin inthlak lehin (he transition period ah pawh hian a hlawhtling reng tho!) ’94 kuma a first 11 te zinga mi 7 lai an chhuah hnuah team thar a din leh a ni. Signing pawimawh Centre-back Jaap Stam te bakah strike-force in rotate char char – Yorke, Cole, Sheringham, Solksjaer – te a nei bawk a ni. Chu chuan an nghahfak European Cup a chawitir ta a ni.

The 2008 Vintage

2002 vel atang khan din chho leh tanin kum 4 chhungin Rio Ferdinand, Edwin Van Der Sar, Vidic, Evra te a lalut a. Tin, talent ropui Wayne Rooney leh Cristiano Ronaldo te an puitling tan bawk nen, chutah Home-grown veteran Giggs, Neville, Scholes leh Brown te tawnhriat chhawr tel bawkin rawlthar tha za leh kum upa lung fing inpawlh mawi lutuk hmangin Moscow ah ropuina a chang leh a nih kha.

Tunah le…

2011 and Beyond – Fergie’s Fledglings V 2.0…?

Chris Smalling, Da Silva phir te, Phil Jones, Johny Evans, Cleverley, Welbeck, Hernandez te bakah kum la upa si lo mahse tawnhriat ngah ni mai tawh Rooney, Nani, Valencia te hi 2008 hnua a lakkhawm te vek niin tihian a duang leh mek a ni a, he team hi a team duan tawhte zinga tha ber te an la ni thei ang em?England leh Europe a Manager leh players elpui te, he Sir Alex-a theihna hre tu leh hmu tawhtu te chuan a nih loh hram an beisei ngei ang chu.