Southampton 2 – 3 Manchester United: Sir Alex-a hnuaia league game 1000naah RvP hattrick hmangin United an lawm!

Pathianni zan inkhelah kaithar Southampton in an mikhual Manchester United lakah tang tluan theilo in, Rickie Lambert leh Morgan Schneiderlin ten tum hnih ngawt hma an hruai pui hnuah Robin van Persie hattrick hmangin United zawk hian point thum an hawn ta a ni.

Sir Alex-a enkawlna hnuaia league game vawi 1000 an khelhna ah Manchester United chuan an inkhelh a hun tawp dawn hnaih tawh hi “United Time” tia an sawi fo thinna chhan an rawn tilang a ni. Hattrick siamtu Robin van Persie hian Premier League-a a goal 100 na a thun chiah bawk a ni.

Inkhel tan hma…

Mualneitu lam hian inhliam nei lemlo mahse Bologna atanga Deadline Day a an lak thar Uruguay winger Gaston Ramirez chu registration an la tihfel hmanloh avangin a khel thei lo a, tin, ani bakah hian leithar tho Japanese star Maya Yoshida pawh a khelh hmel loh bawk a ni. Guilherme Do Prado hi khelmual pawn lama a chetdan chungchangah a club ten an hrem avangin bul tan loin bench ah a thu bawk a ni.

4-3-3/4-5-1 a rawn inremin nikuma an star Rickie Lambert chu hmatawngah an hmang leh a, a theihtawpa tal hnawk a tum leh dawn a ni.

United inhliam zingah Jonny Evans hian kar hmasa ah reserve game khel tawh mahse la inkhelh tir a ni lo ang a, Rio Ferdinand erawh a khelh theih tawh beisei a ni.

Rooney thla khat chawl tur avang hian Robin van Persie chu Valencia, Kagawa leh Young emaw Welbeck ten an thlawp ang.

Team Line-up:

Southampton: K Davis; Clyne, Fox, Fonte, Hooiveld; Puncheon (Mayuka 74′), S Davis, Lallana (Rodriguez 78′), Schneiderlin, Ward-Prowse; Lambert (Guly 75′).

Manchester United: Lindegaard; Rafael, Vidic, Ferdinand, Evra; Cleverley (Scholes 61′), Carrick, Kagawa (Nani 61′); Valencia, Van Persie, Welbeck (Hernandez 71′).

Inkhel an tan ta.

Mikhual lamin bul an tan tha zawk a, a tir minute 15 chhung vel chu ball an chang tam zawk a, inkhel an thunun zawk a ni. Mahse mualneitu lamin an beh zawk laiin goal an rawn thun tlat. Morgan Schneiderlin chuan mual lai atanga ball changin James Puncheon chu penalty area sirah a va pe phei a, ani chuan vawrh lutin Rickie Lambert chuan an goal hmahruai tur a lo tauhlut a ni.

United lamin rulh veleh nghal tumin an bei let nghal a, Shinji Kagawa chuan yard 25 vel atangin hlauhawm takin a rawn pet a, Saints ho keeperย  in a dang thei hram a ni. Hemi hnu hian Kagawa bawk hi United goal thunna turah a tangkai leh hle a ni.

Midfield atangin Kagawa chuan tha taka ball lalutin Welbeck a pe phei nghal a, ani hian ding lampangah Valencia chu pe lehin a ball cross chu van Persie chuan Nathaniel Clyne-a tawlhthluk zarah buai map loin a lo thun a ni.

United hi an rawn pawng tulh tulh dawn emaw tih laiin mualneitu lam hian an chai thei hle in an rawn hlauhawm thin zawk a. Lambert, Puncheon leh Adam Lallana te hmangin an goal nawr a hlauhawm thin hle a, an lansarh zawk phah a ni.

Hun tawp hma deuhah United hi rawn lang ve leh deuhin van Persie leh Evra te chuan chance tha tak an nei leh ve ve a mahse an thun lo a ni.

Chawlhlawk zawhah…

Mikhual lamin bul an rawn tan tha leh zawk a, van Persie leh Kagawa inkawpin Saints ho defence an paldarh a, mahse goal ah an chantir theilo.

Mualneitu lamin a hmaa an tihdan ang bawkin an beh zawk laiin “attacking move” organised lutuk tak maiin an rawn nawr ve leh a, chutah Lambert chuan Schneiderlin tan rawn cross in ani chuan chiang takin goal ah a lo tauhlut a ni.

Hemi hnu hian United tan Kagawa chuan chance a hlah leh bawk a, United lamin goal thun tumin nawr thin mahse an duh angin an nawr thei bik lo a. Van Persie chuan United chhandamna tur ni a rinawm penalty a hlawhchhuak a, hei hi goal khat thun tawh van Persie chuan a pet a, a chip chu keeper Kevin Davis chuan a lo dansak a ni.

United lam hian ball chang tam chho mahse awmze neiin an nawr thei mai bik lo a, Southampton an inveng thiam ve hle a ni.

Chutah le, United an che “United” chho ta!! Minute 86′ naah corner atanga an ball tauhchhuah lo lut leh chu Ferdinand chuan goal ban a tauh per a, chumi lo let chu van Persie chuan rang takin a lo thai lut nghal a ni.

Hun pek belhah Southampton lamin inhamtan hram an la tum a ni ber a, minute 4 pek belh a minute 2 naah van Persie bawk chuan corner atanga tauhlutin a hattrick chuan United point thum a hmuhpui ta a ni.

Sawi zui ang!!

Southampton lam an kheltha tlang hlawm kher mai!! A bikin defence ah Clyne, Fonte leh Fox te, midfield ah Lallana, Puncheon leh Schneiderlin te leh striker Lambert te an khel tha thlawt a ni. Zanina an players te khelh ang khan tun season a an home game zawngah hian an khel thei anih ngat chuan, an leithar te hian beisei an phak bawk chuan rinloh deuhin “top 10 finish” pawh an fight ve thei tlat a ni. Tin, an rawlthar kum 17 mi James Ward-Prowse hi zanin anga a khel zel thei a, hmun a chang chho zel a nih chuan tun season a player naupang duhawm ber pawl a ni chho thei ngei ang le.

An chakloh danah erawh inzir an la ngai deuhna lai a hriat a, top-class opposition lakah chuan a tawp thlenga concentration leh commmitment pek a, tan tluan a pawimawh zia a lang a ni.

Hei mai bakah hian zanina langsar chu manager Nigel Adkins khan tihsual a nei ve niin an sawi hlawm a, hei pawh hi a dik hmel viau a ni. 2-1 anih lai khan an hmahruaina hum tur khan an tactic a thlak a, an goal veng tlat chunga United rawn nawr tur rang taka counter-attack a tumna lama a player kheltha pathum Lallana, Puncheon leh Lambert te a lachhuak kha a fuhlo ve bawk a ni. A player tha ber pathum te hi midfielder leh striker te ni mahse an awmloh chiah khan United khan zalenna an neih phah sawt bakah ball an chan ve a, inkhel an thunun ve deuh theihna tur kawng a tibo vek a ni.

United lam hi kum tin mai deuhthaw hian bultan tha ngailo an ni a, zawi muanga kal chho bek bek thin an ni. Tun season ah pawh hetiang deuh hi an ni leh a, an goal an venghim theilo thin mai nilo in an khingpuite hian min 90 chhungin an chhaihbuai thei hle thin a, an duhthu a sam biklo ngei ang.

Inhliam chhuanlam tur nei mahse an attack lamah pawh mithar te an awm avangin la inman chho mek chu nimahse, tun dinhmunah pawh hian an goal nawr leh inkhel an thunun dan hian champion tur chuan duhthu a la sam chiahlo deuh zawng a ni. Squad selection leh tactics ah an la inremkhawm fuh chiahloh an tuar deuh niin a lang a, tin, an tactical set-up thar te hi player ten an la bel zan lo ni pawhin a lang bawk.

Hei erawh United fans tan chanchin lawmawm, club dangte tan hriat nuam hauhlo a ni ang. Robin van Persie khan penalty pet goal lo chungin hat-trick a la siam thei tho a ni!! United hian ani bakah kum hmasa lama an mamawh em em rawn kengtu Kagawa an nei tawh bawk a, tin, midang an dam kim phawt chuan squad depth an nei tha hle bawk a, an vawi sawmhnih champion na hi tun season a ni lo ang tih a sawilawk theih miahloh a ni.

Pics Source: Getty Images/ dailymail.co.uk

Posted in BPL, English Premier League, Man Utd, Review.

17 Comments

  1. Goal thuntu lakchhuah hi ti fuhlo tak2 an om nual zel a nia…an hah ltuk ,khel thei miah tohlo te nih loh chuan goal an thun avanga an ‘confi’ lai tak mai lak chhuah hi thil fuhlo tak a ni…….Bayrn Munich pawn an hre chiang hle ang chu……….

  2. Players thar an la ngah deuh a,duhthusam in an la khel tha tawk lo deuh zawk a ni,bakah Kagawa khan Van Persie hnung chiah a duh tawk a talpui turin Rooney a la inhliam bawk sia,thla 2,3 hnu velah chuan an solid tawh viau ang ,inhliam langsar an awm lem loh chuan.

  3. #4 & 5…van Persie hlawhchhuah ngei a ni e. Ka tihsualah Zofooty readers te ngaihdamna ka ngen e….siamthat a ni tawh e. taksa nuamsam lo chunga ka post ania, ka tihsualah ngaihdam ka dil e….thanks

  4. Utd fan Rvp lo duhlo tute kha apwr pwr chu anni veleh wm sia…amah vangin utd khel pwh ka hmaih ngai talo…rilru chu a tina ani,mhse ka haw thei thlwtlo,Dutch ani miaua

  5. Van Persie chu kan lo pe fuh hle mai United chu… Southampton te nen an intum tawk viau thei zel a.. ๐Ÿ˜€ A inhliam hma tal hi chuan goal hi thun thun ve teh se… ๐Ÿ™‚

  6. Man Utd kha chak chu an phu rual in , Southampton pawh draw an phu ve bawk in ka hria.. Chelsea laka an chakloh dan nen a in ang khop mai.. Southampton ka rin aiin an khawng tlat. Liverpool te ang vel chu an draw hrim hrim ang ni zan ang game ah kha chuan!!

  7. manU kha an vanneih a kaltluang ve emm a ni, goal hlauhom lutuk nei lem silo khan a top lam ah an pet gol ve leh mai bok a, Ston ho hi an khongaihthlak khop mai, manCity poh kha an chai thei riau a ni…..Utd ho hi chu ka dah sang vak lo ๐Ÿ˜€

  8. Nani hi zawng a consistent lo em a tin ni, manager lu tihai tu a ni e. A that niin tha uchuak viau mahse a chettheihloh ni chuan a corner pet thiamlo lutuk ringawt pawh hi huat tham a tling ania…United a chakpui ngun tluk zetin goal a thun theihloh tir ngun ve bawk a, keizawng ka dahsang em em tawh lo. A thiam chu thiamin a khelhthat niah hlauhawm hle mahse khelh tir ziah tur atan chuan a eng Nani zawk nge (a che tha nge che nawi zawk) rawn lang dawn tih a hriatlawk tlat si loh a…a khelh zawn rei pawhin a khelhdan a inkar thlak vel tho a…lu a tihai deuh tawh ka ti…hehe

  9. Nizan inkhel khan thil tam tak min hriattir chiang ani, Kagawa kha duh aiin English game a la man tawk lo ka tia, tharum ala hmang nasa tawk lo kha ball a hloh phahna leh a tluk ngun nachhan niin ka hria, Nani kha a kheltha a a tir atanga an start tir lo kha mak ka ti, engpawhnise kan chak mai piah lamah RVP an hattrick a han la siam zui a, ka mu ve thei tawh e.

Leave a Reply

Or

Southampton 2 – 3 Manchester United: Sir Alex-a hnuaia league game 1000naah RvP hattrick hmangin United an lawm!

Pathianni zan inkhelah kaithar Southampton in an mikhual Manchester United lakah tang tluan theilo in, Rickie Lambert leh Morgan Schneiderlin ten tum hnih ngawt hma an hruai pui hnuah Robin van Persie hattrick hmangin United zawk hian point thum an hawn ta a ni.

Read More

Posted in Rampawn.

Leave a Reply

Or