Spanish League-a khel mek player te chu club in hlawh an pêk ṭhat loh avangin an nuar a, tunkar tâwpa ṭan tur La Liga BBVA leh Segunda Division (Second division) te an khel duh lo.

Hemi chungchangah hian Zirtawpni khan Spanish League official te leh player aiawhte an inbia a, an inrem thei lo. Spain-a footballer ten páwl an din Spanish Professional Footballers’ Union (AFE) chuan opening round an boycott tur thu hi an puang tawh a, Inrinni leh Thawhṭanni-a inbiakna kal dan azirin karleh (round 2) pawh an khel lo maithei. A hnulam pawh sawichian loh a la ni bawk. La Liga leh Segunda ah hian club 42 an awm mek a, heng club-a khel te chuan nawrh hi an duh tlâng vek tawh a ni.

Engnge an buaina chu?

An buaina bul ber chu club ṭhenkhat ten player te hlawh pek tura an intiam ang an pe thei lo hi a ni. Tunah hian division hrang hranga khel player 200 vel zetin hlawh an la mumal thei lo a, club hrang hrang ten players hlawh an bat tlingkhawm hi US dollar maktaduai 72 zet a tling.

Tunah hian players te hian pawisa tam zawk an phut belh a ni lo a, club nen contract an ziah laia an inremna anga hlawh an lak theih loh vang zawka nuar an ni. He buaina hi tunhnai mai aṭanga thil thleng ni loin hunrei tak aṭanga lo inmung tawh a ni tih kan hriat a ṭha awm e.

Spain Parliament nghawng pha buaina

Engtinnge heti zat zat an bat theih zawk kan ti a ni maithei. Tunah hian Spain ramah dân dinglai a awm a, chu dânah chuan club in a hun taka a ba a pek theih loh chuan bankruptcy a puang thei. Club in bankruptcy a puan tawh chuan a hmaa an inremna ni lo, contract thar (hlawh tlem zawk) ziak turin player te hi an biak (negogiate) leh phalsak an ni a, player te hlawh bat sak phal an ni bawk. He dân hi club ṭhenkhatin an hmang ṭangkai hle a, tunah hian La Liga ah hetiang club hi paruk lai an awm nghe nghe a ni.

Spain Parliament chuan he dân  (bankruptcy law) hi thlaleh ah a ennawn dawn a, an siamṭha a nih chuan hetiang club te hi Third division ah an relegate tawh dawn!!  He dân thar Parliament in a pawm a nih chuan tun season tawpah Spanish League hrang hrang ten an hmang ṭan dawn a ni.

LFP a mangang

Hetia player nawlpuiin league match an boycott hi thil thleng zen zen lo a ni a, ticket man leh TV a pekchhuahna ah te pawisa tamtak a inrawlh a, fans thinrimin buaina an siam lo ang tih a sawi theih loh. Spain rama league football thuneitu sâng Liga de Futbol Profesional (LFP) hruaitute an mangang a, players te nen inremna an zawng zui zel.

Inrinni ah LFP leh AFE aiawhte an inbe leh dawn a, heta an thu azirin kartawp a inkhel awm dawn leh dawn loh a chiang thei dawn a ni.

Players ṭhenkhatte kamchhuak

Espanyol captain Luis Garcia chuan pawisa tam zawk beisei vang ni loin an chanvo dik tak an lâk theih loh avanga nuar an ni tih a sawi a. “A bul aṭanga chinfel vek a nih loh chuan kan inkhel thei tawh lo a ni. A tâwk chin a awm e” a ti.

Hercules striker Tote chuan, “A ṭul a nih chuan kumtluanin Spain ah inkhel a awm lo ang. May thla thlenga kan nawrh a ṭul a nih pawhin kan nuar mai ang” a ti bawk.

Real Zaragoza star striker Ikechukwu Uche thusawi hi kan hriat ṭheuh atan a duhawm. “Player zawng zawngte hi kan hlawh min batsak vek lo a, mahse kan inpumkhat vek a ni. Nawrh hi tu tan mah a ṭha lo a, players, federation leh fans te tan a pawi em em a ni.” a ti. An duh reng vang ni loin, a ṭulna in uai hneh em avanga nuar ta an nih hmel.

Players te an demawm em?

Player te buaina hi a hriatthiampui theih viau awm e. Kar tin club tan theihtawp chhuahin an inkhel a, an hlawh chu engzat pawh lo ni se, club nen inremna an nei tawh a, pek tur a ni mai. Sawrkar hnathawk ten hlawh tam zawk phûta sawrkar an nawr ṭhin dan kan hria a, chutiang pawh ni lo, an hlawh tur dik tak an hmuh theih loh avanga player ten an lungawilohna an lantir hi a awm kan tihpui ṭheuhin a rinawm.

Chutihrualin football ngainatu nih chuan an thutlukna hi kalpui tlang lo hram se tih chu duhthusam a ni awm e. Kha leh chen kan lo nghak tawh a, a tir aṭang La Liga han en theih loh ngawt mai chu hrilh a hai duh hle ang.

Inrinni ah hian inrem thei hrâm se ti chungin beng kan lo chhi tawh mai a ni ang chu.

source: theglobeandmail.com