Italy defender Leonardo Spinazzola chu nimin khan Finland – ah hlawhtling takin zai a ni. Tarlan tawh angin tun Euro khel tha tak kum 28 a upa hi Quarter-finals a Belgium an hneh tum khan a ‘achilles tendon’ a tihnat avangin lakchhuah a ni a, kumin chhungin khelmualah a kir leh hman ang em hriat a ni lo.
Kum 28 a upa Roma tan a khel mek Spinazzola hi Euro 2020 chhunga Italy player langsar ber pawl a tling a, kum thum kal ta khan a khupah hliam na tak a lo tuar tawh. Feet 6 leh inchi 1 a sang niin Juventus ‘duh loh’ a ni a, Turin club – ah 2012- 2019 chhung khan contract nei mahse Serie A – ah vawi 10 chiah a inlan a, club hrang hrang paruk – Empoli, Virtus Lanciano, Siena, Atalanta (vawi 3), Vincenza, leh Perugia – ah te ‘loan’ in chhuahtir a ni. Kum 2019 nipui lai khan Roma chuan euro maktaduai 29.5 zetin an lalut a, vawiin thlengin hmun nghet a la chang.
Kum 24 a nihin ram tan a khel ve tan chauh a, Italy tan vawi 18 a inlan tawh. Tun Euro – ah hian an match hmasa ber a Turkey 3-0 a an hneh tum leh round of 16 – a Austria an hneh tum te khan man of the match atan thlan a ni a. Minute 379 khel hmanin assist 2 a nei a, defending ai mahin attacking lama a tangkaina hi Italy tan a hlutna a ni. Italian player zinga ball cross tam ber leh an khingpuite tlanpel ngun ber a ni a, a thiante goal thun turin ‘chance’ vawi 8 siam tawhin Euro 2020 chhungin defender zingah amah tluk pha an awm lo.
Defender mah nise card a la hmu miah lo a, tum khat chiah a la foul bawk. An khingpuite vawi 17 tlan pel tawhin ‘attacking third’ ah ball vawi 25 a pe tawh. Penalty area chhungah ball vawi 11 a tlan luhpui tawh bawk.
A inhliam hmaa Tottenham – in an lo hmuh taih hman Spinazzola hi tun Euro avang hian a rawn tha ta hluai tihna a ni lo a, amaherawhchu Italy player hmuhnawm ber te zinga mi a ni miau a, a hlutna chu a san belh ngei ang. Serie A tih loh inelna level sang a la khel tlem hle a, Champions League – ah vawi khat a inlan ve tawh.
BBC pundit Chris Sutton phei chuan,“A hmun ruak hi hnawhkhah theih a ni lo. Ama aia inlan tur chu an awm ngei ang a, mahse ka tan chuan tun inelnaa player tha ber a ni,” tiin a sawi. Spinazzola aiah hian Chelsea defender Emerson a luh rin a ni.
2006 FIFA World Cup – ah khan Italy hian Spinazzola tluk zet a hriat la hlawh lo Fabio Grosso kha an lo ‘vanneih’ pui tawh a, tun tumah hian eng tak thleng ang maw ?
