Vawiin ni 28th October 2011 khan Chaltlang YMA Hall ah Sports Minister Pu Zodintluanga’n ni 10 chhung awh tur Coach Education Programme chu a hawng. Pu Zodintluanga chuan,”Kan vannei em em a, Chief Minister zahawm tak Sports lama tui em em kan nei a, anni hi Mizoram Football Association (MFA) dintu zing ami leh President hmasaber ni a. Anni kaihhruaina hnuaiah football ah mai ni lo, discipline hrang hrang ah hmasawnna kan nei mek a. Hei hi kan hotute lamin min tuipui vang a n a, vawiin ni ah infrastructure chi hrang hrang football ground tha kan siam tam lutuk a, MFA lam intan loh phei chuan mipui lamin min bei tawh mai a, ‘Government of Artificial Grass’ te minti tawh mai ania, chuvang chuan football lama tuimite hi in tan a ngai a ni,” tiin vawiin hawnna inkhawm a kalte a hrilh.

He hawnna inkhawm ah hian a hawngtu Sports Minister Zodintluanga, MFA hruaitute, Aizawl District Football Association (ADFA) hruaitu te, Sports Promotion Officer Pu C. Laltlanthanga leh Sports lama mi pawimawh te bakah Coach Education Programme a tel tur Coach 25 te he hun hi an hmang.

MFA Honorary Secretary Lalnghinghlova Hmar (Tetea) pawn he hun ah hian thusawiin Football Coach training tur mi 25 te chu an theihtawp chhuah turin a fuih a, sawrkar in pawisa tam tak a seng avangin tih mai mai ai chuan tih loh law law a that zawk thu leh a ti tha lo leh thiam lo na na chuan certificate an hmuh loh tur thu a sawi tel bawk.

Coach Instructor tur British mi Hugh Lewis hian amah pui turin Bangalore lam mi Santosh Kiran a hruai tel bawk a. A hotu ber tur Hugh hi UEFA ‘A’ License nei a nih mai bakah English FA Coach Educator a ni a, khawvel hmun hrang hranga football coach-te zirtir thintu a ni a, tunah hian SPT Sports Management Pvt Ltd, Bangalore-ah head of football development hna a chelh mek a ni.

Hugh hian Turkey ramah te chuan khaw lum lai berin 50 degree celsius te a kai a, a vawt lai berin 20 degree celsius te anih thung avangin sik leh sa awm dan inthlak thleng nasat avangin inkhelhna boruak atan chuan a that tawk loh thu a sawi rualin, football lama an sang thu ZoFooty a hrilh a. Mizoram erawh sik leh sa awm dan chu inkhelhna boruak atana tha tak anih thu a sawi tel bawk.

ZoFooty in India ram football hmasawnna lohna chhan hi enge tih a zawhna chu chhangin, Hugh chuan,”Hetiang lampang hi duh angin a la buaipui hmanloh avangin chhan harsa a tih thu a sawi a, mahse a lang thei chinah chuan infrastructure chhia chu a bulpui ber pakhat anih thu a sawi a. Chumai bakah grassroot level atanga zirtirna a awmloh chu chhan dang pakhat anih thu a sawi tel bawk. Grassroot level atanga in zirtir hi a pawimawh a tih thu a sawi bawk”.

“Ni 10 chhung lekin Coaching hi a inzirtir theih dawn ami?” tih zawhna chu , Hugh chuan,”Coaching rawn chhim tu te an pawimawh viau ang, hmun dangah pawh he programme hi ka lo ti tawh a, a programme kalphung hi a hrechiang a. A hlawhtling ngei ka ring,” tiin ZoFooty a hrilh.