SPURS HNEH NA’N GOAL KHAT A TAWK

Manchester United 1-0 Tottenham FT
Man : Mkhitaryan 29′

Manchester United chuan Old Trafford-a Tottenham lo mikhualin minute 29-naa Armenian winger Mkhitaryan goal thun hmangin hnehna an chang.

Inkhel tantirh atangin mualneitu zawk a hriat a,lei hrula Ibrahimovic-a cross ball tha tak chu Pogba chuan Lloris-a dan theih turin a pet. Khawvela player man to ber £89m man pet atan chuan a ho lam deuh.

United hian an nawr chhunzawm zel a, Harry Kane chuan mual laiah ball a hloh a, Herrera chuan chhuhsakin through ball a pe. Hei hi Henrikh Mkhitaryan chuan Hugo Lloris-a lu chungah kawh zetin a thun. Armenian zinga Premier League goal thun hmasa ber a ni.

Ball chang tam zawk Spurs tan Eriksen chuan free-kick atangin a thun teuh hle a, South Korean forward Son chuan a hun tha vawi 2 a khawhral bawk.

Zaina a game 700-na khel Ibrahimovic chuan hun remchang a neihah zawitein a pet a, Herrera pet changkang zet chu Lloris bawkin a dang a, Anthony Martial chuan vanlam hawiin a pet daih bawk.

Second half-ah an si phurh sut tumin Spurs in tan an khawh a, Eriksen-a pet tha tak chu De Gea bawkin a lo dang leh a, Eriksen-a free-kick chu changtu nei lo Kenyan defensive midfielder Wanayama chuan ban pahnih sirah a tauh daih bawk!

Paul Pogba chuan free-kick ropui pet nain dodaltu a nei, chu chu goal ban a ni. Goal lo mahse free-kick ropui a tling.

Team pahnih tan winger pahnih Eriksen leh Mkhitaryan an langsar a, chutihlaiin Harry Kane a hrang thei lo va, Premier League club hrang hrang 24 a hmachhawn zinga club 21 laka goal thun thei Kane chuan United lamah goal a thun thei lo chhunzawm zel.

Tun tum hi Old Trafford a thuthmun rem club a hmachhawn vawi 6-na niin goal ala thun ta chuang lo cheu.

Inhliam avangib Mkhitaryan lakchhuah a ni a, Spurs in an player khel tha tak Eriksen an thlak daih bawk! An tisual deuh em aw?

Pochettino hian manager hna a thawh hnuah Man. United hi vawi 4 hmachhawn tawhin ala hneh lo vek a, zaninah a vawi 5 na’na tlawm lehin a mangchhia a reh thei lo.

United tana goal thun tam ber ni thei dinhmuna ding Rooney chu mual chhungah a hmel hmuh tur a awm lo bawk.

Heti hian Spurs chuan point 27 hmuin 5-na an luah chhunzawm zel a, hnehna chang zawk United chuan point 24 hmuin 6-na an luah chhunzawm a, hmalam an pan zel