Emmanuel Adebayor chuan first-half ah goal hnih khungin Tottenham Hotspur chuan Aston Villa an hneh a, league table-ah 3-na an ni ta.

Thawhtan zan Premier League inkhel awmchhunah Tottenham hian Aston Villa an lo mikhual a. Minute 14-naah Adebayor hian in-uisalehlin chungin goal nalh tak a khung a. First half tawp hma hretin goal khat dang a khung leh bawk. Heng goal hnihah te hian Gareth Bale a inrawlh ve ve.

Second half-ah pawh Spurs hian ro an rel leh a, chance tam tak an nei a, mahse goal an khung belh thei lova, an goal lam erawh Villa player-te hian an tibuai tehchiam lo. Spurs hi Premier League match 9-a match 8 an chakna a ni tawh a, point 25 hmuin, Chelsea, Liverpool leh Arsenal-te aiin point 3 in an sang a, goal difference-ah Newcastle aia sangin 3-na an ni ta a ni. Heti chung hian Spurs hi (Everton nen) midang zawng aiin game khatin an la khel tlem zui a ni.
Spurs boss Harry Redknapp chuan a naute khelh danah a lawm thu a sawi a, “Inkhelh hi nuam an ti a ni,” a ti tawp mai. Adebayor-a’n goal hnih khung mahse Harry chuan midang a hmuh hmaih lova, “Luka (Modric) a khel tha a, Scott Parker pawh khel tha tak a ni. Tlar hnungah pawh kan thain ka hria, Kaboul hian a khel tha takzet,” a ti bawk.

Redknapp chuan tuna an khelh ang renga an khelh theih chuan an champion theih a rin thu sawiin,  “Kan chak zel a, kan inrintawkna kan hloh loh phawt chuan champion hi thil theih a ni. Tuna kan khelh anga kan khelh reng chuan kan champion ang, mahse a harsa khawp ang,” a ti thung.

Tottenham hi an League game hnuhnung 9 ah chak loh nei lovin an kal tluang tawh a, match 9 zinga match 8 ah hian an chak vek  a. Match 9 ah hian a lo berah goal 2 tal an khung ziah bawk a che tha tak hi an ni ringawt.

Table thar hetiang hi a ni –