Spurs sawmna hnartu India striker Chuni
Ziaktu : John Zothansanga
Asian Games 1962 a zo a, football-ah India-in gold medal an la. ‘The golden generation of Indian football’ an tihte hlawhtlinna hi India ram titi a tling pha a, he team-a player-te pawh an coach Syed Abdul Rahim hoin ngaihven an hlawh hle.
Chutianga ngaihven hlawh zingah team captain Chuni Goswami pawh a tel. Tottenham Hotspur-in an hnena trial nei tura an sawmna chu a hum ran a, mahni maia thutlukna siam a thiam lo – European football chu eng ang nge a nih pawh a hrethiam lo.
A club khelhna Mohun Bagan hotu zinga mi, Dhiren-da tia an koh mai thin nen chuan an titi a, an pu ngaihdan lak a duh. Dhiren-da hian, “Eng nge England-ah chuan nangmah chauhin i tih ang?” tiin a zawt a, amah maia nunchan a zir tur chu a ngaihtuah.
Chuni Goswami-a’n uluk takin a pu thusawi a ngaihtuah a, England-a chona thar hmachhawn ai chuan a hmangaih Mohun Bagan tana khelh chhunzawm a thlang – Kolkata club-ah hian hlawh a la ngai lo!
Chuni chuan, “Mohun Bagan tan khan inkhelh zawhah balhla leh chhang thawp kan dawng țhin a, chu chu a tawk a ni,” tiin sum an um ve ngaih loh thu a sawi.
Mahse, State Bank of India-ah football vangin hna a hmuh phah nia sawi a ni a, kum 1960 khan thla khatah Rs.450 a hlawh țhin – Spurs sawmna a hnar kha a inchhir loh thu a sawi.
April 2020-a kum 82 mi nia thi ta Chuni hian Olympics, Asian Games, Asia Cup leh Merdeka Cup-ah te India tan a khel a, Asian Games-a gold a lakpui bakah kum 1964 khan Asian Cup-ah captain ni chungin pahnihna a nihpui.
Kum 1962-a ‘Best striker of Asia’ a thlan Chuni hi first class cricketer a ni tel! First class cricket-ah match 46 ngawt a khel hman a, run 1592 siamin wicket 47 a la a, a vawm that ber tumin run 47-a pekah wicket nga a la thei.
Calcutta University-a lehkha a zir laiin an college tan football leh cricket-ah captain a ni kawp thei a, Ranji Trophy 1971-72 season-ah khan West Bengal captain niin final a hruai thleng a, 1962-63 season-a final lut team-ah pawh a tel.
Indian striker ropui hian,”Khatihlai kha chuan West Bengal tana kan khelhin cricket aiin football-ah kan hlawh hnem zawk thin,” a ti mauh mai!
Chuni hian a vanglai khan fans tam tak a nei a, bollywood star zingah pawh fans a nei nual – India President (1962-67) Sarvapalli Radhakrishnan pawh khan a ngaisang hle niin an sawi.
