ST. MARY’ STADIUM-AH ARSENAL IN HNEHNA AN CHANG – Lawmkima Hmar

Southamton 0-2 Arsenal FT
Sanchez 59′, Giroud 83′

Arsenal chuan Southamton lakah si hnih fai a hnehna changin Champions League khelh beiseina an nei lian sawt.
.
Mikhual team tana hmun duhawm lo, meikhup a an haw fona thin Saint Mary’s Stadium-ah hian bul an tan tha bik lova, ball chang tam zawk mah se Forster aiin Petr Cech a zuang zing zawk.
.
Saints tan winger Nathan Redmond chuan goal a thun hle a, Petr Cech-a kutphah ropuiin Gunners a chhanhim.
.
Arsenal wing-back Chamberlain khel tha mah se inhliam avangin thlak a ngai a, an game a zuai phah.
.
First half-a goal a luh loh hnuah, a khel ve lo nge maw ni aw tih tur khawp a chawlhlawk hmaa langsar lo Sanchez a rawn nung thar a, Southamton defender ten an zîm deuh reng ta mai.
.
An khelh dan enin goal a hnai tih a lang. Minute 59-naah Arsenal player ten a bu a mi an entawn em ni aw tih tur khawp a mawiin ball an inpe kual a, amah danchah tumtu Saints defender 2 te a chinphar zet hnuah Sanchez chuan goal hmahruai a thun.
.
Southamton in an muala tlawm an duh lo, he hmunah hian Arsenal vawi 8 hmachhawnin vawi 2 chiah an tlawm tih hre rengin an bei let. Mahse, bench atanga lut rau rauvah Shane Long (Sou) aiin Giroud (Ars) a ropui zawk.
.
Minute 83-naah Sanchez chuan box veilam chhip hnaih atangin far post a awm Ramsey tan ball a vawrh lut. Wales midfielder hian goal-ah tauh mai lovin mahni hmasial lo takin goal ban lehlam bul a awm Giroud-a tan a tauh chho. Hun tawp lam a par thin Giroud chuan chiang takin a lo tauh goal
.
Hun tawp thlengin innawr tawn mah se goal dang a lut ta lova, Arsenal in hnehna hlu tak an chang ta a ni.

Tun season EPL a goal 20 thun tlingtu Sanchez hian a career a a tawnsan ber tum tawngin tun tum hi domestic league pakhata season khata goal 20 a thun tlinna a ni. Arsenal a pan hma season a Barca tan a La Liga-a goal 19 thun a mellung a phun chu sawhsawnin a awm ta.
.
Sanchez hian tun season inelna hrang hrangah goal 25 thun tawhin assist 15 a nei tawh a, Van Persie hnu lam a season khata league a goal 20 thun tling thei awm chhun a ni.
.
Giroud hian 2012/13 season atanga chhiarin Premier League-ah a lu hmangin goal 25 a thun tawh a, tluk an awm rih lo. Tun season Premier League-ah bench atanga lutin goal 6 a thun tling ta bawk a, substitute goal thun thei ber a ni mek.
.
Heti hian Arsenal chuan point 66 hmuin Manchester United an lehpel ta a, an chungah hian Manchester City (69 pts) leh Liverpool (70 pts) te awmin The Reds hian City aiin game khatin an khel tam zawk.
.
Match a tlem, point duhthawh a na; palina inchuh boruak a hot telh telh dawn e.

Posted in Rampawn.

Leave a Reply

Or