EGYPT 0 – 2 BRAZIL (Jonas 39′, 59′)

Bob Bradley chuan Egypt coach a nih atanga a game hmasa berah Brazil a hneh zo lo a ni. Valencia striker Jonas chuan goal hnih thunin Brazil a chakpui thung. He Gremio sharpshooter thin hian half-time hma leh hnu ah goal khat ve ve thunin, inkhel thununtu zawk Brazil a chakpui ta a ni.

Egypt hian bul tan tha in Brazil hi an insiamrem mai thei lo a, an khel a tang a, a tir atanga rhythm neih tir loh an tum tih a hriat. Egypt hian tlan nasa in an nawr viau avang hian a ball chang tam zawk Brazil hian a tir lamah chuan tihvak ngaihna an hre lemlo a ni.

Porto striker Hulk a engkimah a inrawlh a ni ber mai. Game tan atanga reiloteah free-kick hlauhawm zet mai a pet a, chumi hnuah a tharum leh ball thiam tilangin defender pahnih tlanpelin goal bar chungah a pet a ni. Egypt hian Brazil defender te hi an awmtir mai mai bik lova, an chhaih buai hneh ve hle a ni. Diego Alves paw’n vawikhat chu tha takin a lo save a ni.

1st half tawp dawn lamah dinglam atangin Hulk chuan chak tak maiin ball a tlanluhpui chu area chhunga a cross a, chu chu Jonas chuan awlsam tak maiin a lo “tap-in” mai a ni. Heihi Jonas an ram tana a goal thun vawikhatna a ni a, a lawm hle tih a hriat a ni.

Chawlhlawk zawh veleh hian Jonas bawk hian chance a nei tha leh hle a, Egypt keeper El Shenawy chu a goal atanga rawn tlanchhuahtirin a “sidestep” a, mahse a ball pet chu defender Herzagi chuan goal line hma hratah a lo dang a ni. Herzagi hi goal post a a intauhnaah a intihnat phah nghe nghe a ni.

Tichuan darkar khat an khel tling vel tihah chuan Fernandinho a chance neih El Shenawy a lo dan per chu Jonas bawk chuan lo la in goal ah a chantir ta a ni. Hei hian Egypt a ti hnual a, hemi hnu lawk hian Lazio midfielder Hernanes chuan chance tha lutuk a nei a, mahse a sir hrat a ni. Hemi zan hian Ahmed Hassan chu substitute atanga a rawn lut chuan lawm a hlawh hle a, ani hi Egypt tan vawi 179 a khelhna chiah a ni a, khawlvel football a mahni ram tana khel hnem ber a ni.

He game hi Mano Menezes a pawlte hian tunhnai game ruk a game nga hnehna an channa a ni. Nakum February ah Cairo ah hemite pahnih hi an inkhel leh dawn a ni.

BRAZIL: Diego Alves; Dani Alves, Thiago Silva, David Luiz, Alex Sandro; Lucas, Fernandinho (Elias), Hernanes, Bruno Cesar (Willian); Hulk (Dudu), Jonas (Kleber Laube Pinheiro)

EGYPT: Ahmed Al Shenawi; Ahmed Fathy, Ahmed Hegazy, Wael Gomaa (Ahmed Said), Mohamed Nassef; Hossam Ghaly (Ibrahim Salah), Hosni Abd Rabou (Ahmed Hassan), Mahmoud Shikabala Fadlallah (Waleed Soliman), Ahmed El Mohamady; Mohamed Zidan (Mohamed El-Gabbas), Emad Mohamed Abd El Naby Ibrahim