STEVEN GERRARD BORUAK A LIAN

#ZoFooty

Long_Reads:

STEVEN GERRARD BORUAK A LIAN

English Premier League club Aston Villa chuan Scotland champion Rangers manager ni lai Steven Gerrard chu an manager turin an la lut a. Hei hi tunlai infiamna khawvel, a bik takin English football-ah phei chuan chanchin lian leh langsar ber a ni awm e.

Dean Smith thlaktu tur hian manager tha dang an awm nual. Mahse, Premier League-a Steven Gerrard manager nghet a ni ta hi English football-ah a boruak a tê thei lo a ni.

Gerrard hi Liverpool player ropui, Liverpool tana rinawm tluan tling a ni a. Liverpool tana a khelh lai khan tuna Aston Villa Chief Executive ni lai Christian Purslow hi Liverpool managing Director a ni a. Gerrard leh Purslow hi an thenawm pa ve ve ai mahin an inhre chiang zawk maithei a. Football club enkawl chungchangah phei chuan an rilru tur awm an inhre sa deuh vek maithei. Chuvangin, Villa leh Gerrard tan hian manager tura duhthlanna siam hi a harsa lo ve ve sa ang.

Villa neitu – Nassef Sawiris leh Wes Edens-te hian Rangers neitute aiin Gerrard-a hnenah hian player leina tur pawisa an pe hnem thei zawk dawn tih a chiang a. Gerrard hian manager tak tak ni tura a kawng zawhnaah Villa hi kailawn tha tak ni dawnin a hmu a ni pakhat maithei. [Hetih lai hian Gerrard chuan tun weekend Press Conference-ah Liverpool panna kailawn anga Aston Villa sawi a ni chu a fair lo a tih thu leh chutiang chuan a sawi ngai dawn lo tih a sawi a..]

Celtic enkawl a, chumi hnua Leicester City enkawl tura Premier League rawn pan leh, Liverpool manager hlui Brendan Rodgers-a kawng zawh chu Gerrard hian rawn zawh ve a tum a, a tifuh ve ang em le!?

Chutih lai chuan Gerrard hi English football mai ni lo, football khawvelah pawh pa langsar, smart leh zah kai a ni pha ve a. Chutiang a nih avang chuan Villa-ah hian rilru nei rana thil kalpui a, a hmalam hun ngaihtuah rana thil ti tur a ni lo ang tih hi mi zawng zawngin an rin dan a ni ngei ang. A theihtawp a chhuah ngei ang. Mahse, a tum ber chu Liverpool enkawl a ni dawn tih erawh khawvel hian a hrethiam sa a, tumahin an dem a rinawm loh thung.

Tin, Villa-ah hian a hlawhtlin loh vaih chuan engti kawng mahin Liverpool-ah hian manager-in a kal dawn lo tih hi nang leh kei aiin Gerrard hian a hrechiang fe zawk dawn a. Chuvangin, Villa hi a theih leh thiamna zawng zawngin a enkawl ngei ngei ang tih hi rinhlelh tur a awm lo.

A nihna takah chuan Scotland ramah, Rangers a hlawhtlin pui a, tun season-ah pawh an hmelma hlun Celtic aia point 4-a sangin an awm leh hman tawh a. Duh se chuan Ibrox-ah, hmingtha takin a awm zel thei chiang ang. Mahse, Liverpool manager nih a tumna kawngah boruak sang zawk hip a mamawh tih hi nang leh kei pawhin kan hriat pui thiam a nia. Sawi tam a ngai lo ve.

Villa a enkawl chhung hian a hlawhchham der thei tih pawh a hre ngei dawn a. Mahse, Gerrard hi kum 41 a ni a, tuna hun remchang a hmuh zuan tur khawpin a puitling tawh a, chu chona hmachhawn ngam tur khawp chuan a tawnhriat a tha a, a huaisen bawk a. Villa-ah hian a hlawhchham a nih chuan Liverpool tana a tha leh zung a lo sen tawhna ringawt khan a chhandam zo dawn lo tih a chiang hle bawk ang.

Liverpool neitu Fenway Sports Group-te hian Anfield leh a chhehvêl mai bakah, Anfield lam hawia tawngtai thin, khawvel hmun hrang hranga Liverpool fan-te ang bawkin Liverpool tana Gerrard-a pawimawhna hi an hrechiang a. Chuti chung chuan an sumdawnnaah hian lung tileng hla lungkuai sak hmanga hlawhtlinna a awm lo tih an hrechiang a. Gerrard a nih vang ringawtin Jurgen Klopp thlaktu turin an la lut lo ang tih a rin theih.

Chutiang boruak karah chuan Gerrard hian inring tawk takin Villa Park a rawn pan a. A nih nih ni turin a rawn lût a ni tih hi a lang reng mai.

Rangers chu Scottish League-ah, kum 10 lai an hlawhchham hnuah a champion pui ngei mai a. Mahse, amah sawiseltute chuan kum thum leh a chanve chhungin trophy pakhat chiah a chawi pui tih an sawi ri. A dik. Mahse, kum 10 chhung an hmelma Celtic-in fiamthu an thawh khum tawh Rangers tan Scottish Title aia hlu a awm lo a. Season liamtaa game 38 chhung League-a hneh loh nei miah lova an champion aia nuam kha Rangers fan-te tan a awm thei rih lo. Chumi thlentu chu Gerrard a ni a, sawi hnawm hleihtheih a ni lo.

A inkhelh laia field chhunga rothap em em kha, a player enkawl danah a huaisen tih a lang a, Rangers striker tha, nunphung tha lem lo Alfredo Morelos a enkawl danah chu chu a hriat vek. Chutihlai chuan media a hmachhawn danah a smart em em si. Hei hian Premier League manager a nih hnua a che vel hmuh a tichakawm zual a ni.

Rangers hian season liam ta khan season tluanin goal 13 chiah an chhuah a, chu chuan Gerrard hian tlar hnung a ngai pawimawh tih a tilang a. 4-3-3 formation a hmang a, tlar hnung player a hmang thiam a. Right-back James Tavernier chuan goal 12 a khung a, assist vawi 9 a nei bawk a; Gerrard-a style chu a lang e!

Villa a rawn luh hnuah pawh Premier League-a goal khung tam 8-na an ni a, mahse, goal an chhuah hnem tih a rawn hmu nghal a. Tlar hnung thuam that chu a rilru kaptu a ni tih a sawi lang tawh nghe nghe.

Villa hian Premier League chanchina mi langsar ber zinga mi an la lût tih an hria a. Club board leh player thlengin tûnah hian nuam an ti dawn a. Rangers chhuahsan a hreh lo tih a sawi atang khan Villa hian manager dang an melh tawh lo rêng rêng an ti. Chu chuan Villa hotute leh player-tea Gerrard-a boruak a hril chiang hle awm e.

Mahse, Premier League-a 16-naa awm mek, point 2 chauhva relegation zone hlat mek a enkawl dawn a, kawng awlsam chu a ni dawn lo. Chutih lai chuan Gerrard-a lakah beiseina a sang dawn chiang sa a. Season liamta khan Villa hi 11-na an ni a, chu aia sanga awm chu an tum dawn a. Jack Grealish an hralhna pawisa khan Danny Ings, Leon Bailey leh Emiliano Buendia te an lei a, hengho hi player tha an ni a. Mahse, Gerrard hian ama player lei ngei pawh a duh dawn a. January thlaa a bazar vel tur pawh hmuh a châkawm tel.

Kawng hrang hrang kan thlir tawh a. Villa leh Gerrard te inkarah hian inhriatthiamna a awm chiang a. Beiseina pawh an nei tawn tih a chiang bawk a. Club supporter-te pawhin field sira Gerrard a din hun hi tlumtea thlirin an thlir dawn a. Club dang mit pawh a chungah a fu dawn. A ngaihnawm zel ang.