I-League gameweek 14 pawh khelh zawh a ni leh ta. Pathianni chawhnu-ah inkhel pahnih a awm a, gameweek 14 a ‘big match’ ah Churchill Brothers in an mikhual Mohun Bagan an hneh lo a, he inkhelah hian Bagan striker, Churchill player hlui Odafa Okolie chuan hattrick a siam a ni. Mizo tlangval Lalrindika Ralte pawhin Churchill Brothers tan goal 1 a thun.

Mumbai FC leh Salgaocar te inkhelah Salgaocar 1-0 in an chak bawk.

Churchill Brothers 2 – 3 Mohun Bagan

Inkhel ṭan phat aṭangin game a rang nghal hle. Minute 4 lekah Churchill Brothers striker Mohammed Rafi cross chu penalty box chhunga vengtu nei lo Larindika Ralte chuan a pet goal a, 1-0. He goal thun thei tura Didika movement chu a zahpuiawm loh hle.

Goal a luh hnu hian Mohun Bagan an khel ṭha zawk. Passing game mumal tak khelin midfield-ah ro an rel a, ‘home team’ hi an kât a ni deuh ber. Minute 18 ah dinglam aṭanga ball cross chu Bagan striker Odafa chuan mawi taka a control hnuah a pet goal. Odafa hi Churchill Brothers defender pahnih inkarah duhtawkin a che thei a, Churchill goalkeeper a lawm lo kher asin. Bagan tân Jewel Raja leh Odafa ten goal kham (bar) an pet per ve ve bawk. First half tawp dawnah mual neitu lam hian rawn nawr ve leh deuh mahse chawlhlawk hmain goal dang a luhbelh tawh lo.

Second half tirlamah Bagan tan substitute Barreto chuan a thun nghal teuh hle a,  team pahnihte an inhnehtawk angreng hle. Minute 60 ah Didika chu inhliam vangin zâwnchhuah a ngai a, a inhliam hi a ‘serious’ lutuk loh kan beisei.

Bagan chakna Odafa

Inhnehtawk taka an innawrtawn zak zak laiin, minute 73 ah penalty box pâwn aṭanga Odafa shot chu ho angreng takin Churchill keeper in a chhuah a, 1-2 a ni. Hemi hnu lawk hian penalty aṭangin Odafa bawkin a thun leh bawk. Odafa hian I-League ah goal 14 thun tawhin, top scorer Ranti Martins chu goal 1 chiahin a pha lo tawh.

A tawplama Churchill Brothers nawrlet a hmuhnawm a, minute 80-a substitute Henri Antchouet pet goal hnu phei chuan an goal nawr a na tawh hle. Henri, Opara leh Beto ten goal hlauhawm tak tak an nei a, uihawm takin an ṭhelh vek a ni.

Ti hian, game 14 a point 27 hmu tawh Mohun Bagan hi pathumna an ni ta a, pahnihna East Bengal nen an point hmuh zat inang mahse goal difference ah an hniam zawk rih a ni. Churchill Brothers hian point 26 hmuin palina an ni a, mahse Dempo, East Bengal leh Mohun Bagan te aiin game 1 in an la khel tlem zawk a ni.