‎”Scotland-ah hian Pathian rawngbawl turin ka rawn kal a. Dundee United atang hian Pathian tan thil ropui tih ka duh a ni. In duh chuan Juan Sara evangelist ti pawhin min ko thei ang,” tiin kum 2000 kuma Dundee United a zawm dawn khan Juan Sara chuan a sawi.

Juan Sara hi Argentine mi a ni a, Argentine Footballer ropui tia sawi tur chu nilo mahse Pathian mithmuhah chuan Evangelist Footballer ropui a ni ngei ang le. Kum 2001 khan Scottish Premier League (SPL) ah chuan Henrik Larsson dawttu niin season khatah goal 17 lai mai a thun a, heng goal a thun apiang hian a jersey chu hlipin a hnuaia ‘Jesus Loves You’ tih inziak chu inkhel entu te leh TV atanga lo thlirtu te hmuh theih tur hian a tarlang ziah a ni.

Juan Sara chuan, “Cerro Porteno (Paraguay Club) a ka khelh laiin ka thianpa Sergio Racadale-an Biakinah inkhawm tur in min hruai ve thin a, chung hun lai chuan Football lamah ka bei hi a dawng em em a, Footballer tha ka nih theihna turin tanpuitu ka mamawh em em lai a ni a. Tumkhat chu chutia Biakin a kan inkhawm lai chuan thusawitu chuan Philipi 4:19 (Tin, ka Pathian chuan Krista Isuaa a ropuina ngahzia ang zelin in tlakchhamna tinreng pawh a phuhruksak ang che u.) leh Johana 3:16 (Pathianin khawvel a hmangaih em em a, chutichuan a Fapa mal neih chhun a pe a, amah chu tupawh a ring apiang an boral loh va, chatuana nunna an neih zawk nan) te a rawn chhiar a, chu chuan ka thinlung chu a hnehin umbeh theih rual lovin keimahah hna a thawk ta a. Tichuan kei pawhin ka nun chu Pathian hnenah ka hla ta nghal a ni. Lal Isua Krista chu ka Lal leh Chhandamtu ah ka pawm a, chumi hnu atang chuan thlamuanna leh hlimna chu nitinin ka chang zui ta zel anih hi,” a ti.

Nitin Bible chhiar a hlah ngai lova, kawng tinrengah Pathian ringtu a nihna chu a zahpui ngai lova, a chhuang em em zawk thin. “Kristian zawng zawng te hian mawhphurhna kan nei theuh a, kan awmna hmun theuhah chanchin tha hril hi kan tihtur a ni. Keipawh ka thian pakhatin thlarau bo, Juan Sara hi Pathian hnenah min hruaithleng a, kei pawhin ka thian te, ka inkhelh pui te leh kan inkhel min thlir tute hnena chanchintha hril hi ka bat niin ka ngai ve tlat a ni,” tiin a thahnem ngaihna thu te a sawi a ni.

Chanchinbu lam miten a pet goal a Pathian thu ziak a pholan kher thin nachhan an zawt a, heti hian a chhang, “Hei hi Pathian ka rinzia leh chanchintha mite ka hrilh hriat ve na remchang niin ka ngai a. Kei leh Pathian inkar hi ka dah pawimawh hmasa ber a, Lalpa hriatna tello hlimna leh lawmna chu a lem a, nun hi a ruak a, a tui hal fo thin.”

Juan Sara hian pawimawh a tih ber chu nitin a Lalpa zui a, a hnena a thusawi te ngaichang chung leh kawng a ruatsak ah te leh a kawhhmuhah te kal zel mai hi a ni.