Season leh a Europa League khelh tum Sunderland an tang a, ni thum liamta chhung khan player thar panga ngawt an nei hman.
Season hmasa-a Birmingham player khel tha ber pawl, English midfielder Craig Gardner chu nimin khan an lei fel a, a man hi official a puanzar nilo mahse £6 million vel a nih rin a ni. Aston Villa tan pawha lo khel tawh Gardner hian season hmasa khan goal 10 ngawt a thun a, midfielder goal thun thei mamawh tak Sunderland tan mamawh chhanna a nih ngei a beiseiawm. Gardner hi kum 24 mi a ni a, Sunderland ah hian kum 3 chhung atan contract a ziak a ni.
Ipswich Town atang Connor Wickham an la hian Sunderland fans te a ti phur ber awm e. Liverpool, Arsenal leh Totteham te pawhin lei an duh em em, English player ‘hottest property’ an tih Wickham hi kum 18 lek a la ni a, Championship-a player ngaihven hlawh ber pawl a ni tawh. A man hi £8.1 million vel niin a khelh that dan azirin £12 million thlengin a sang chho thei a ni. Season leh ah Asamoah Gyan te nen an inkawp tur hi an chhe vak bik lo ang.
Nimin vek khan South Korean striker Ji Dong-won chu Chunnan Dragons atangin an lei a, a man zat puanzar a ni lo. Kum 20 a upa Ji hian kum 3 chhung atan contract a ziak a ni.
Birmingham City player Sebastian Larsson leh Coventry City keeper Westwood te chu an club a an contract a zo tawh a, an lo indawr lawk tawh angin vawiin atang hian Sunderland official player an ni tawh dawn a ni.