# Borussia Dortmund sporting director Michael Zorc chuan German midfielder Mario Gotze chuan tun season tawp hian Dortmund a chhuahsan dawn tih a sawi. Kum 27 a upa player vanduai tak Gotze contract neih lai hi tun season tawp rual hian a zo dawn a ni. 2014 World Cup – a Germany champion – na goal thuntu Gotze hian Dortmund leh Bayern Munich tan hlawhtling takin lo khel tawh mahse kum 2017 February atang khan natna danglam tak mai ‘myopathy’ an tih chu veiin ngai a awh leh meuh tawh lo a ni.
# ISL club Hyderabad FC assistant manager leh India international hlui Mehrajuddin Wadoo chuan tukin zinga J&K police te’n a chunga an thil tih danah a lawm loh thu a sawi. Kum 36 a upa Wadoo hi a nu dam lo serious tak hmu tura a kal chu J&K police te hian lo ti dingin police station – ah darkar hnih ngawt hrengin a phone pawh an laksak niin a sawi. “OC ka biak lahin ‘I nu chu a serious viau a nih chuan thih tir mai mai rawh’ tiin min ankhum lehnghal a ! J&K police te hian ran ang maiin min en a ni,” tiin a thinrim thu a auchhuahpui. Wadoo hi a vanglaia India defender tha ber pawl niin East Bengal, Mohun Bagan, Salgaacar, Mohammedan, Sporting Goa, Pune City, Chennaiyin leh Mumbai City FC tan a lo khel tawh a, kum 2005 – 2011 chhung India tan a khel bawk.
# Spain Prime Minister Pedro Sanchez chuan La Liga chu entu awm loin June ni 8 atangin khelh tan theih a nih thu a puang. La Liga president Javier Tebas chuan sorkar thutluknaah hian an lawm thu sawiin fimkhur taka hma an lak tur thu a sawi. La Liga – ah hian team tinin game 11 khelh la hmabakin hmahruaitu Barcelona in pahnihna Real Madrid an khumna chu point hnih a ni.
