TAWI NAWI

# Bundesliga khelh chhunzawm mekah zanin dar 10:00 hian Signal Iduna Park – ah Borussia Dortmund in hmahruaitu Bayern Munich an mikhual dawn. Dortmund hi pahnihna ni mekin Bayern nen an inthlauhna hi point 4 chauh a ni a. Bundesliga – a tuma el phak loh ni thin Robert Lewandowski leh amah el pha mai tur a ngaih rawlthar duhawm Erling Braut Håland te inhmachhawn tur hian inkhel tur boruak a vawrh kang hle a, mak tak maiin tun season – ah striker pahnih te hian inelna hrang hrangah game 41 ve ve khel tawhin goal 35 ve ve an thun tawh a ni.
 
# Inhliam vanga hun engemaw chen chawl tawh Manchester United player pahnih Marcus Rashford leh Paul Pogba te chu an dam leh tawh a, Premier League tan a nih leh veleh an inlan theih a beiseiawm. Player pahnih te hi an dinhmun a tha a, training pawh an zawm leh tawh niin United manager Ole Gunnar Solskjaer chuan a sawi.
 
# Chinese club Shanghai Shenhua atanga Manchester United tan a ‘loan’ a khel mek Odion Ighalo chu Old Trafford – ah a cham chhunzawm dawn lo niin a lang. Kum 30 a upa Nigerian striker hi kumin January thla khan United hian Marcus Rashford – a inhliam chhunga thlaveng atan an lalut a, tun thla ni 31 hian a ‘loan’ hun chhung hi a zo dawn a ni.
 
# Bournemouth goalkeeper Aaron Ramsdale chuan Covid – 19 a kai tih a sawi. Kum 22 a upa Ramsdale hi Premier League player leh staff mi 1,744 endik tawh zinga mi 8 positive zingah a tel a ni.