TAWN THAR DI

#ZoFooty

Aw hmeltha-
Nula hmeltha leh zei deuh pakhat hi, pasal a thlan fuh loh avangin a nih tur ang a ni pha lo va, khawpui nula ni mah se a hawi sang tak tak thei lo. A tawp a tawpah pasal dang neiin, a tifuh ta phian a, a pasal chuan chawi sangin, chenna ngai loh ram a fanpui ta!

Tawnmang ramah-
March Ni 10, kum 1905-a din Chelsea hi London khawpui club duhawm tak ni reng mah se, 1954-55 First Division-a an Champion bak League no mawi chawi lova hun rei tak an awm hnuah, kum 2003-a a tawn thar di chuan tawnmang ramah a thlawhpui ta delh delh mai.

Hmanah chuan-
Kum 1877-a sak, Athletic Stadium Stamford Bridge hi kum 1904 khan Gus Mears leh Joseph Mears te kutah a awm pum hlum a. Chutia an kuta a awm hnu chuan, Athletic Stadium ringawt atana hman ai chuan tiin, Football Stadium atan an buatsaih a. A bul hnaia Club lar tak Fulham chu luah turin a sawm; mahse, Craven Cottage luahtu Fulham hian an lo hnar tak si avangin, Gus Mears chuan Stamford Bridge behchhana Football Club din ve mai a rilruk ta zawk a, a Club thar hming atan Kensington FC, Stamford Bridge FC, London FC tih te hnawlin, Chelsea FC chu March 10, 1905 khan a din ta a ni.

Chelsea a chuai-
Hun rei lo teah Professional-ah inziak lutin, kum 1905 atangin Second Division-ah an khel a, kum hnih hnuah First Division-ah an in hlang kai. 1954-55 ah chuan Club thang duang berte zinga mi niin First Division Champion an ni thei a ni. Phur taka hma lam pan zelin, League no mawi chawi chhoh zel inbeisei mah se, an beiseina chu a thamral a, London Club duhawm leh thang duang tak chu Club vantlang pakhat mai a ni chho leh ta a, no mawi chawi tur aia First Division-a an dinhmun sawh nghet tura an beih fat fat ni lah a tam; a chang phei chuan hlawhchhamin, Division hniam zawkah te an khel leh lawp lawp thin.

Tawn thar di-
Chutianga, din leh tluk fawma kal hram hram, Club thenkhatin Champion an tum laia inham tan tum chang nei thin Chelsea duhawmna chuan chuai lam a pan a, chu khawpui nula hmeltha chuan chul lam a pan mek laiin, kum 2003 khan hmangaihtu thar a tawng ta!

A tawn thar di Russian billionaire Roman Abramovich chuan amah neih nan £140 million zet a seng nghal a, a duhawmna leh hmelthatna te chu tuai thar leh tumin a tan a neih a ui lo. A Coach duh tak Jose Mourinho a la lut nghal a, a hlawh zatah a buai lo. Chu Chelsea, inham tan tuma beih chang nei thin Club chu, sang taka thlawhpui tur chuan Player tha lei a ngai tih a hria a, Player thar lei nan £100 million a hmang nghal pawp bawk. Chuai mek Chelsea chu tuai tharin a awm a, kum 2004-05 Season-ah ropui takin Premier League-ah an Champion a, hma lam an pan zel a; 2005-06 ah Champion chhunzawmin, 2009–10, 2014–15, 2016–17 ah te no mawi an chawi ta zel a ni.

Hmangaihna dik-
Chelsea siam liantu Russian pa hausa hian, Club neitu thenkhat ang lo takin Football a hmangaih a, sum leh paia a thahnemngaih aia nasain Chelsea Result leh no mawi lamah thahnem a ngai tih a hmuh theih. Chu chuan Chelsea chu van sangah a thlawh tir a, a aia sang thlawk zel tura theihna sang tak nei chungin Season thar an hmachhawn dawn – Blues tan beisei neih san a ngamawm. Chelsea Supporter-te, Season tha tak hmanga, no mawi nena Stamford Bridge zawh ngei turin duhsakna kan hlan a che u.