TEAM THA BERIN KHEL RAWH SE!

Tihfuh vang ni lo, team tha ber an nih avanginAizawl FC chuan Hero I-League nomawi kan ram leilungah ngêi mai an rawn hawn a. Kan Zoram mai ni lo, India ram pumah football ngaina mite chuan an chanchin kan la sawi mek a nih hi.

Champion lâwma Mizo mipuite kan la rik luih luih lai mekin Indian football a league kalphung thar lo piang tura ruahmanna kal mekah I-League champion Aizawl FC chuan league sângber an khel thei dawn lo tih thâwm a lo awm nghâl a, hei hi kan titi pui ber a ni zui ta!

AIFF leh IMG-Reliance te hmalakna kalzelah Indian Super League (ISL) a team awm sa bakah tuna I-League atangin team 3 bâk ISL ah hian lakluh an tum lo ni a sawi a ni a, chung team 3 ni a an sawi chu – Bengaluru, East Bengal leh Mohun Bagan te an ni.

India ram football league inelna sangber I-League nomawi kawltu in season tharah league inelna sangber an khel thei lo ang maw? India rama club tha ber Aizawl FC bâka phu tunge awm chuang?

Aizawl FC hnuaiah club hrawl pui pui, sum ngah tak tak an intlar thla duat a, mahse nomawi hi sum hmanga lei theih a nih loh avangin season tluana team tha berin nomawi an chawi a, sawi nêp theih a ni lo. ISL hi club hlun leh pawisa ngahte chauh khelh tur em mi niang? A tha ber leh a thiam ber team in an khel mai dawn lo em ni?

Premier League en ta ila, club hlutna an tehnaah Manchester City chu £525.85m a ni a, chutihlaimek chuan Premier League club tho Burnley hlutna chu £85m a ni. Burnley hi an club hlutna ang zawnga chhûtsakin Premier League an khel thei lo ang ti ve ringawt ila, a dik dawn em ni? Championship atanga Premier League a kai thei tura an khelh avangin English league sangberah an khel a, an club hlutna leh an sum neihte chhûtsak an ni lo.

Tun season Championship (English football 2nd Division) a hmahruaitu Brighton & Hove Albion F.C. hi en ta ila, an club hlutna chu £50.2m a ni a, Championship team rau rau zingah pawh anni aia club hlutna sâng hi club 7 lai an awm a. Mahse an club hlutna atanga tehin season tharah Premier League an khel dawn lo a, an that vang leh an phu avangin season tharah English football a league sângber an khel dawn a ni.

Chutiang chiah chuan I-League champion Aizawl FC hi an club hlutna emaw an club hlun leh hlun loh emaw chhûtsak a ngai lo a, an phû avang leh India ram cluba a tha ber an nih avangin season tharah pawh kalphung thar an lo tan ta anih pawhin Indian football ah top flight football khelh an phu a, season tluana India club lian an tih hovin an umphak loh an nih avangin LEAGUE SANGBER HI KHEL RAWH SE.