Manchester City captain hlui Carlos Tevez-a chungchang hi kan sawi zo hlei thei dawn lo a nih awm hi. City-in an hrem a, a titau a. City-in a hlawh cut sak char char mahse engahmah a ngai lova, Argentina-ah a awmsan daih mai. Amah duhtu club an pung zel a, City lahin tlawm tea hralh an tum loh thu an sawi reng bawk a. January thla chhung hian City hi a chhuahsan ang tih sawi theih a ni leh tawh lo.

Manchester City chairman Khaldoon al-Mubarak chuan Tevez hi man tlawm te-a hralh an tum lo tih a sawi nawn leh tawh a. Tunah hian Inter Milan leh Paris St Germain te chuan an duh thu an sawi a, mahse kum 27 a upa Tevez hian AC Milan-a kal a duh thu a sawi reng bawk. AC Milan hian pound maktaduai 20.9 in an dawr a, hei hi City chuan hnawlin, pound maktaduai 25 lo chuan an hralh phal lo tih an sawi. Hetiang a nih mek lai hian tun thla tir lam khan Brazil-a hmun pakhatah Tevez leh a advisor Kia Jooranchian leh AC Milan Vice-President Adriano Galliani te chuan thla an la ho a. Hei hian City Chairman Khaldoon hi a tilawm tehchiam lo a ni ang, ṭawng chhuak ngai vak lo a ni na a, “AC Milan-ah hian, tun dinhmunah chuan Tevez hi a kal hmel loh a ni,” a ti a. “Galliani leh Tevez-a Advisor-te hi hlim taka inbe mai lovin, kan phût ang hi pawisa min pe mai se a dik zawk ang,” a ti deuh hmak mai!

Tevez-a camp lam pawhin thuchhuah siam ve nghalin, Tevez-a chungchangah hian mimal thil chu an sawi ve thei a, mahse a man chungchang erawh City thuneitute kut liau liau a ni tih an hriat chian thu an sawi ve a ni.

Hetih lai vek hian AC Milan vice-president Adriano Galliani chuan Manchester City duh loh Carlos Tevez chu tun thlasik transfer hun hawn chhung hian lei turin beiseina an la nei zel tih a sawi a. Chutihrual chuan Tevez hi an la thei lo a nih chuan Catania atangin Maxi Lopez an lakluh tur thu a sawi.

Rossoneri hian tun hnai khan Tevez lakluh tuma an beihna chu an chawlhsan thu an puang a nih kha. Mahse Galliani hian Tevez lakluh an tum thu hi a tharthawh leh tawh a. Kum 27 upa Tevez hian Milan-a kal hi a duh niin a sawi bawk.

Galliani chuan, “Tevez hian Milan-a kal a duh a, keini pawhin Tevez hi kan duh a ni. Tunah hian ni sarih chhung hun kan la nei a, eng thil nge thleng dawn kan la en zel ang chu,” a ti.

Hetih lai hian, kan hriat angin France club hausa thar Paris St Germain leh Inter Milan chuan Tevez hi lakluh tumin an hel ve reng a. Anni laka an hloh a nih chuan Fulham-in lakluh an tum, Catania player Maxi Lopez chu an lakluh tur thu a sawi a. Report thenkhatah chuan Milan leh Lopez te hi an inrem tawh niin ziah a ni.

Galliani chuan, “Tevez hi a lo lut lo a nih chuan Lopez hian min rawn zawm ang. Anni pahnih zinga pakhat zawk zawk hi kan la ang, an pahnih chuan kan la kawp lovang,” a ti bawk.

Galliani bawk hian, “Lopez hi Milan-ah a awm der tawh niin a lang a. Medical nei tur chuan kan la nghak deuh rih ang. Ani hi kan player duh a ni a, Catania leh amah (Lopez) nen hian kan inrem tawh a, awlsam tein kan lalut thei reng a ni,” a ti bawk.