Manchester City striker Carlos Tevez chuan ngaihdam a dil ta nge nge a, ‘Tihtakzetin ngaihdam ka dil,’ a ti ta!
Kan hriat fo tawh angin Bayern Munich nen an inkhelh tumin City boss Roberto Mancini chuan Tevez hi a inkhel duh lo tiin, City tan a khelh tawh loh tur thu a sawi a. Ngaihdam dil turin a ti a, mahse Tevez hi a tang ve tlat a. A titau a, Argentina lamah a hawsan vel a. City hian a kar ruk hlawh (kar tin pound nuai 2 a hlawh!) an pe duh lova. Hei pawh hi Tevez chuan Premier League thuneitute hnenah a khung bawk a ni. Hetianga ngaihdam a dil takah hian he a khinna pawh hi a hnukdawk leh nghal bawk.
Thla thum aia tam Argentina-a a awm hnuah England-ah a lo kir leh a. A rawn kir leh hnuah Mancini chuan ngaihdam a dil phawt chuan City tana khelhtir a hreh loh thu a lo sawi leh nghal a. Club danga chhuah tum viau mahse a theih tak ngang loh avangin Tevez hi a beidawng deuh a ni maithei, ngaihdam dilna a chhak chhuak ta nge nge a ni.
City-in thuchhuah an siamah Tevez-a ngaihdam dil thu hi an ziak a. Tevez-a chuan, “Thla thum liamta atanga an rilru ka lo tihnat tawh zawng zawngte chungah tihtak meuhvin ngaihdam ka dil e. Manchester City FC tana football khel tura intuaihriam ka duh ber tawh a ni,” a ti.
Kar hmasaa Manchester City-a Carrington training ground a luh hnuah Tevez hi a team-mate te nen training lovin, amahin training pek a ni a, kar hnih hnuah a in fit theih tur thu a sawi a. In fit hman pawh ni se Nilai zana Europa League-a Porto an khelh hunah an squad list-a telh a nih tawh loh avangin a khel thei lo thung.
Tevez hian Munich khawpuia Allianz Arena-a Bayern Munich an hneh loh tum, September ni 27 atang khan City tan a la khel leh miah lo a ni.
City manager Mancini chuan Tevez hi a biak tawh leh tawh loh te, an inhmuh tawh leh tawh loh te a sawi duh miah lo!