TFA THUNAWI

Season tharah Bengaluru FC leh Tata Steel enkawl tur Jamshedpur team ten Indian Super League (ISL) an khel dawn tih kan hre tawh a.

Bengaluru FC hi kan hriat angin sumdawng lian JSW Group enkawl an ni a, kum 2013 a din chauh ni mahse I-League ah tum hnih an champion tawh bakah Federation Cup an chawi tawh a, Indian club zinga AFC Cup final lut awmchhun an ni bawk. Club naupang leh hausa, thangduang tak an ni.

India mi hausa zingah ‘Tata Family’ thil phalzia kan hria a, kum 1987 ah Jamshedpur ah hian Tata Football Academy (TFA) an din. India rama football academy tha ber ang hial a ngaih a ni thin a, he academy hian India international player 135 chherchhuak tawhin age level hrang hrangah captain ni pha mi 19 an awm tawh bawk.

Jamshedpur team hian an team hming tur leh an logo tur te, an team enkawltu tur leh player te la puangzar lo mahse rilru ah TFA a lo lang lo thei lo a, TFA hi ‘upgrade’ in an ISL team innghah nan hman an tum ni te pawhin sawi a awm. Hei erawhin hun a duh deuh maithei.

TFA – ah hian kum 1992 khan ‘first batch’ in an zir chhuak a, an zingah hian India captain ni zui ta leh TFA coach (2002-2008) a nih laia Mizo player te enkawl thintu Carlton Chapman pawh a tel.

Mizote zinga a hmasa ber atan kum 2002 khan S.Malsawmtluanga chuan TFA atang hian a rawn zir chhuak a, Mama batchmate zingah Syed Rahim Nabi hi kan hriat lar ber a nih a rinawm.

Kum 2004 ah Jerry Zirsanga, Malsawma leh Vanlalrova ten an zir chhuak ve leh a, anni batch hi mi 14 an ni a, tuna India goalkeeper Subrata Paul leh Gouramangi Singh te pawh hi an tel.

Kum 2006 ah P.C.Lalawmpuia, Robert Lalthlamuana leh Khanthang Paite te an graduate ve leh a, he mi tum hian Khawzawl tlangval Robert-a hi ‘Best Gentleman Cadet’ atan thlan a ni nghe nghe.

Kum 2008 ah C.Malsawmkima, Henry Gangte leh Lalramluaha te’n an rawn zir chhuak ve lehin kum 2012 khan Mizo hnahthlak Siam Hangal chuan a zui a, anni hnu hian Mizo zingah TFA atanga zir chhuak an awm leh ta lo.

Posted in India, Ramchhung.

Leave a Reply

Or