Menrei zân kan thleng leh ta e. Club football-a inelna level sâng ber, UEFA Champions League chu Thawhlehni (13.09.2011) aṭangin khelh ṭan a ni leh dawn a, Europe ram hrang hranga football club ‘ṭha bik’ ten a thiam ber nih an inchuh dawn. Team 31 ten Barcelona nomawi chhuhsak an tum ang a, style inang lo, thiam leh thiam an innuai dawn e. Menrei man a va awm leh dawn em.

Thawhlehniah inkhel hmuhnawm tak tak beisei tur a awm a, Camp Nou-a inkhel tur hi a ‘boruak’ ber awm e.

Barcelona vs AC Milan (Camp Nou)

Hemite pahnih inkhel tur hi opening round-ah chuan en chakawm ber a ni awm e. Spanish champion leh Italian champion an intum dawn a, kartâwpa chak zo lo ve ve, insiamṭhat tum ve ve an ni dawn a, en a ‘nuam’ viau ang.

Barcelona an ṭha tual tual

Season hmasaa Barcelona team kha football team awm tawh zinga ropui ber an ti hial a nih kha. An ropui ber tak tak nge tak tak lo chu mimal ngaihdan a ni a, mahse thil chiang tak chu tuna Barcelona hi season hmasa aiin an ṭha zawk tih hi a ni.

La Liga an awpbet a, European champion an ni a,  La Liga-ah duh angin bulṭan fuh chiah lo mahse khawvela team ṭha ber an ni tih hi kan pawmtlang vek awm e. Champions League-ah hian a zâwna champion thei an la awm ngai lo a, he record hi break thei an awm a nih chuan tuna Barcelona team hi a ni ngei ang le.

Xavi, Iniesta, Fabregas leh Villa te hoin Messi an châwm dawn a, tlarhnungah captain Carlos Puyol chu a khelh theih hmel bawk. Hetihlai hian Alexis Sanchez chu inhliam vangin kar 8 vel ngawt a chawlh a ngai dawn a, Gerard Pique pawh a dam hman hmel loh.

Probable line up: Valdes; Dani Alves, Puyol, Abidal, Adriano; Busquets; Xavi, Iniesta; Fabregas, Messi, Villa

AC Milan hmatâwng a bil

Europe-a vawi 7 champion tawh AC Milan lamah ‘star striker’ Ibrahimovic chu a khel thei dawn lo a, ani bakah Robinho leh Gattuso te pawhin Barca an hmachhawn thei lo ang.

Lazio nen an intum khan 4-3-1-2 formation an hmang a, Kevin Prince Boateng chu Ibra leh Cassano te hnungah a khel a nih kha. Ibra aiah Pato a luh beisei ila, midfield leh defence hi a bul aṭanga a tawp thlengin an ṭan mar pat a ngai ngei ang. Nesta, Thiago Silva, Antonini te ho hian minute 90 chhung Barca forward te an dang zo angem?

Boateng a zam lo a, Camp Nou-ah chak ngei a tum. “Barcelona hi hneh theih loh an ti maw? Chutiang ai chuan ka inkhel ve lo law law zawk mai ang. Football-ah hneh theih loh an awm lo” a ti hmiah mai. Kartâwpah lei thar Aquilani a khel ṭha viau a, AC Milan hian point hmuh an tum a nih chuan a he Italian midfielder hi a pawimawh viau awm e.

Probable line up: Abbiati; Abate, Nesta, Silva, Antonini; Seedorf, van Bommel, Aquilani; Boateng; Cassano, Pato.

Messi Messi

Season hmasa-a goal 12 thuntu Lionel Messi hi Milan tâna vên uluk ngai ber a ni awm e. Season thum chhung chu a zawnin Champions League-ah top scorer a ni tawh a, Thawhleh zanah a thiam a theihnghilh thut ring suh.

Camp Nou ah Barcelona hi European game 10 chhung chu chakloh nei loin an lo kaltluang tawh a, hei hi AC Milan in an tihtâwpsak thei angem? Club lian inkhelah chuan result beisei loh a thleng fo a ni tih theihnghilh lo ang aw.

Borussia Dortmund vs Arsenal

German champion Borussia Dortmund hian 2002/03 season hnu lama an Champions League game hmasa berah English club lian Arsenal an mikhual dawn. German club hi Rosicky club hlui a ni.

Arsenal hian season bul an ṭan tha lo a, mahse an game hnuhnung berah an chak avangin an confi sawt a rinawm. Player thar ṭha tak tak an nei tawh bawk a, midfield lamah thâwl deuh mahse (inhliam vangin) chak ngei tumin German an pan ngei ang. Tlarhmaah Gervinho a khel thei ang a, Van Persie hi Premier League lamah chuan pet goal deuh reng mai a ni tih kan la theihnghilh awm lo e.

2002/03 ah khan he club pahnihte  hi an lo intum tawh a, London-ah Arsenal hi 2-0 a chakin German ah Dortmund 2-1 an chak thung. Dortmund goal 2 hi Rosicky thun ve ve a ni nghe nghe. Hummels, Gotze leh Zidan te ho hi level sângah en chiah nge an an dawn hmuh a chakawm tawh ngei mai.

Chelsea vs Bayer Leverkusen

Stamford Bridge-ah Michael Ballack-a hoin Leverkusen an leng lut dawn a, mikhual chunga ṭhat chhuah duh lo tak Chelsea hian an player hlui hi an lo duat vak a rinawm loh.

Chelsea hian Champions League group stage-ah record an nei ṭha hle a, season hnuhnung pariatah vawi 6 chu group winner an ni a, knock-out round an la lut ziah a ni. Bayer hian 2004/05 hnulamah Champions League an la khel leh lo a, England-a an mikhualna hnuhnung 7 ah chak an la nei lo bawk.

He match ah hian Villas-Boas hian tunge striker a thlan ang tih hriat a chakawm tawh a, Torres hi a khel lo emaw, a khelṭha lo emaw a nih chuan a tân a pawithui viau angem?

Genk in Valencia an mikhual ang a, Olympiacos leh Marseille an intum dawn. Inkhel tur ho hi a hnuaiah kan rawn tarlang a, time hi CET vek niin, darkar 4.30 zel belh tur a ni.