Aston Villa captain Stiliyan Petrov chuan thisen cancer (Acute Leukemia) a vei tih hriatchhuah a ni !!!

Kum 32 a upa Petrov hi Inrinni a Arsenal an hneh loh hnu lawk khan a khua a sik ṭan a, test hrang hrang lâk a nih hnuah Zirtawpni khan thisen lama doctor thiam bikten an endik a, thisen cancer rang chi a vei tih an hmuchhuak ta a ni. Hmun hrang hranga Aston Villa fans leh football ngainatute thin a ṭhâwng khawp ang le.

Petrov-a khelhna Aston Villa chuan thuchhuah an siam nghal a, “Inrinni kaltaa Arsenal nen an inkhelh hnuah Stiliyan hi a khua a sik ṭan a, Dr Ian McGuinness enkawlna hnuaiah test chi hrang hrang neihpui nghal niin, Haematology mithiam te chuan thisen cancer a vei ngei tih hi vawiin (Zirtawpni) ah an tichiang a ni.

“Tun aṭanga reilote-ah Stiliyan-a natna hi hriatchian zel kan inbeisei a, a nupui leh a chhungte kan tawrhpui takzet a ni. Stiliyan-a privacy zahsak turin kan inngen a, a chanchin kan hriatbelh ang ang kan tarlang zel dawn a ni.

“Stiliyan hian ngainat leh lawm a hlawh em em a, Villa aṭanga ṭanpuina leh duhsakna a dawn theih zawng zawng a dawng vek ang tih kan tiam a, hlim takin a hmawr kan bawk ang tih kan ring tlat a ni.” tiin club website ah an tarlang.

Bulgarian midfielder hian kum 2006 ah Celtic aṭangin Aston Villa a zawm a, kumhnih leh a chanve vel chu club captain a ni tawh. Premier League-ah, a thiam ang hu a player fak hlawh lo pawl tak a ni ngei awm e.

Hmanni lawkah ‘heart attack’ vangin Muamba a tlu tawh a, tunah thisen cancer vangin natna khumah Petrov a awm mek bawk. Acute leukemia hi thisen cancer ah pawh a rang chi a ni a, thihpui pawh an tamin, thawh pawh a thawk chak viau a ni. Kan ngaihsan em em footballer te pawh hi keimahni ang tho a na tuara mangang ve thei, hmangaihna leh duhsakna mamawh ve tho an lo ni e. Aston Villa captain hi field chhungah kan hmu tawh dawn lo niin a lang ta ?

source: sports.yahoo.com