THUAMLUAIA MUAL – Lawmkima Hmar

Mizoram Premier League 6, Round 8 an khelhna tur Thuamluaia Mual, Lunglei hian chanchin ngaihnawm tak a nei a, hmunzawl, Savun hampuar petna tura duan satliah a ni lo.

Thuamluaia Mual hi tun dinhmunah chuan Lungleia mual puitling leh tournament pangngai khelhna tur awmchhun a ni a, Phullem phahna mual Mizoramin a neih 4 zinga pakhat a ni.

Dubhi Mual tia hriat thin niin September 10, 2009 a Lunglei District Sports Committee, General Meeting chuan LDSC Ground No-1 tih thin chu Thuamluaia Mual tiin a thlak ta a nih kha.

A hming hi Mizo pa ropui Pu C.Thuamluaia hming chawia sak niin mual luhna Gate bulah Pu Thuamluaia Lim (Statue) pawh hmuh tur a awm nghe nghe.

Thisena lei : He mual hi awlsam taka mipuiin an neih a ni lo va, thisen chhuak meuh a, hruaitu hmasa ten an sual chhuah a ni.

He mual bul lawkah hian Lunglei Gov’t High School a awm thin a, an headmaster chu Pu C. Thuamluaia a ni. Sipai leh mipui (High School naupang) ten mual hi inremsiamin an inhmantawm thin a, buaina lutuk an nei ngai lo.

Kum 1952 khan khan thil duhawm lo, kan vanneihpui ta chu thlengin mual hman chungchangah sipai leh High School naupang an inhmuthiam ta tlat lo. Buaina chhuah chhan hi sawi dan hrang hrang a awm.

Hetih hunlaia he school a kal, pawl 9 zirlai, hmaichhan ngeia ka biak, Dr.Hranghrima chuan : “Sipaite hian an hun bawhpelhin mual an la hmang tlat mai a, High School naupangte chuan inkhelh duh tawh mahse mualah sipai an la inkhel reng mai si, tihngaihna dang awm hek lo le; an ball an petliam sak a, buaina a awm zui ta a ni,” a ti.

Amaherawhchu, buaina chhuah lai hian a hmunah a awm ve loh avangin a thiante tawngka emaw atanga a hriat ve tho a ni. Thenkhat chuan sipai hian naupang inkhel lai an hnawtdarh niin an sawi thung.

Tichuan le; school naupang te chu sipai lamin luhchhuahin an lehkhabute an paih darhsak a, zirlai ho nen chuan an insual buai zui ta chiam mai a ni. Pu Hrima sawi zui danin : He an buai thu hi thingpui dawra chawl mek school naupangte chuan an hre ve thuai a, an zinga mi KL Rochama (ex- MLA) chu mualah a tlan thla nghal a, sipaite chu kuttum nen a hmachhawn a, huaisen taka sipai a hmachhawnnaah a kut zungte invuahna lai a tikhaw lo va, tun thleng hian a la khuar nghe nghe.

Hemi tuma an inbei hi a nep lo hle a, talhfiak, thingfak, lungtum leh kuttum pawh a leng nasa hle. He school a kal ve, lehkha thiam thei tak, Thingsai tlangval Dengphalova chu a tang hle a, sipai pakhat chu lunga den hial a tum a, amaherawhchu, a lung chawi a rih lutuk avangin a den tum sipai awmna a deng pha ta lo va, ‘a hming nen pawh a inrem viau e,’ an ti.

He buaina avang hian hliam tuar neuh neuh an awm a, zan lamah boruak a la sang viau a, zirlai naupangte lengchhuak lo tura tih an ni nghe nghe.

Pu C.Thuamluaia ruahmannain zirlai kut tuarte chu thiam takin an nuar a, naupangten school an kal duh loh avangin sawrkar milian leh sipai hotute beng a thleng thuai a, mual chu vantlang ta a nihzia au chhuahpuiin SDO hmaah Assam Rifle ho nen chuan an inkhing a, a tawpah hnehna changin SDO in mual chu vantlang ta a nih tawh tur thuin a rem ta a ni.

Kan mual : Tunah chuan Artificial Grass phah niin a changtlung thawkhat tawh hle a, MFC Cup 2017 an nghaha hmun hi Mizoram huap tournament khelh na’n pawh a iaiawm lo hle. Amaherawchu, kan dim thiam tawk loh avangin grass a bet tlat a, kaihthawh a awm chuang bawk si lo! Motor lian tlan luhtir kan chin avangin Pavillion hnaih lam phei chu a khuar nasa bik hle. Ruahsur nikhua pawhin tui a luang ral zung zung thei lo va, inkhel a khaihlak hial thin.

Kumin October 12 & 13 a Mizoram Premier League Round 8 khelhna turah hian media box etc a awm lo! Phuahchawp ala ngai.

Official pavilion a official rih lo hle a, substitute player leh team official te nen inpawlhsawp a ngai fo. Tuna, official pavilion atana hman mek chung chiah hi sak belh a ni hunah erawh Video coverage atan pawh buaina a awm tawh lo vang (hei erawh hmathlir). A hungna duhthusam lo pawh changtlung zawka siam a ni dawn hnai a, kum khat hnu velah chuan mawi taka hung chhuah a nih a rinawm. Toilet etc pawh duhthusam a changtlung a awm thuai beisei a ni bawk.

Mizorama mual tha ber anga an sawi hial thin hi Lunglei a mual puitling awmchhun niin, kan mi hmasaten thisen chhuak meuha an lei a ni a, mual dang zawng aiin a hlu a, duat pawh a phu hle.

A chhunga i pen luh a, a phullem i rah hun chuan:

‘He hmuna zalen taka i leu vel theih na’n hian, mihuaisente thisen a far tawh a, a vaivut hi an thlan leh thisena luan a lo ni tawh’ tih i hre reng dawn nia.

(Thlalatu : Drone siamthiam leh thlalak thiam, Joseph Lr)