Wigan Athletic hian kum khat dang English Premier League an khel leh ang tih hi mi tam takin an ring lovang. Nikum September  ni 10 leh November ni 6 inkara game 8 chhung a zawna an chak loh lai te, kar 26 ngawt mai relegation zone-a an awm dan te, goal 60 chhuah a, goal 39 chauh an khung laite khan tumahin season thara Premier League team ni leh turin an ring lovang. Mahse an ni a, season thar Premier League-ah Wigan kan hmu leh dawn tlat. A mak mang e!

Che chhe hle mahse, Wigan manager Roberto Martinez hi Wigan Board chuan an ban duh tlat lo mai a. Mak deuh maiin Liverpool, Manchester United, Arsenal, Newcastle, Stoke City leh Blackburn Rovers-te a rawn hneh a. Heng team zinga pathumte hi Premier League top 5 ami an ni a, Liverpool hi top 5 ah lang rih lo mahse, eng lai mahin English football-ah hian hneh awlsam an ni ngai lo. Wigan Board thutlukna hi a dik tih kan hmu zel a ni ber e!

Wigan-in an game hnuhnung pariat an khelhdan hian anmahni damkhawchhuahna mai bakah thildang pawh a hring tel teuh a. EPL title inchuhna leh Champions League khelh inchuhnaah awmzia a nei nasa hle. Manchester United an hneh avangin Manchester City tan hla mawi an sa a. Arsenal leh Newcastle an hneh avangin Tottenham tan Champions League khelh pha turin kawlah beiseina an zam thar tir leh bawk.

Wigan game hnuhnung pariat te lo thlir nawn leh thuak thuak ila –

1. 24th March, 2012 – vs Liverpool: DW Stadium-ah goal awm lovin an lo draw tawh a, Anfield-ah pawh an khel thei khawp mai. Shaun Maloney chuan penalty atangin goal hmahruai a khung a, Luis Suarez chuan Liverpool tan goal khung ve mahse, Gary Caldwell chuan goal khungin Wigan hi 2-1 in an chak a. Kar 9 zet relegation zone-a an awm hnuah Anfield-a hnehna an chan hi an tan a pawimawh tawpkhawk a ni.

 2. 31st March, 2012 – vs Stoke City: He inkhel hi an rilruah Premier League-a an khelh zel theih rinna nghet tak neihtirtu a ni ngeiin a lang. He inkhel hi a tir atanga a tawp thlengin an thunun tluan chhuak a. Antolin Alcaraz leh Victor Moses te chuan goal an khung a, tun season-a a vawikhat nan an chak zawn ve tlat.

 3. 7th April, 2012 – vs Chelsea: He inkhelah hian Chelsea chuan 2-1 in hneh mahse, Wigan hi an tlawm lo. Wigan boss Roberto Martinez chuan referee-te a sawisel nasa a. An inkhel enin, Chelsea goal khungte chu sawisel theih ve ve a ni a, referee-te tihsual vang liau liuvin Chelsea an chak tih hi Wigan tan lotu tan pawh a pawmawm a ni.

 4. 11th April, 2012 – vs Manchester United: He match hi League table chunglama point 8 laia sang fal tawh United tlakchhiatna bul a ni awm e. Wigan hi champion khelhin an khel ti ila a dik ang. Yard 20 vel atangin Shaun Maloney chuan goal mawi lutuk a khung a, an chakpui a. Vawi 14 an intumnaa United laka an vawikhat chakna chauh a ni nghe nghe.

 5. 16th April, 2012 – vs Arsenal: Inkhelh tan atanga minute 7-na leh minute 8-naah goal an khung nghal a, relegation zone atangin an zuang chhuak ta. Martinez chuan beiseina nen season thar a thlir leh thei tawh.

 6. 21st April, 2012 – vs Fulham: 2-1 in Fulham an chak na a, Wigan chuan away-ah pawh an khel thei hrep mai tih an lantir leh pek.

7. 28th April, 2012 – vs Newcastle: 4-0 ngawta Newcastle an sawp hi a mak. Tun season-a Newcastle chet ropuizia ngaihtuah tel phei chuan a mak hian a mak tawp. Maloney leh Moses-te an langsar leh a, Franco Di Santo a rawn lang zauh bawk.

 8. 7th May, 2012 – vs Blackburn Rovers: He match-ah hian Premier League chanchina chhinchhiahtlak pahnih a thleng a. Tla thla tawh tura ngaih ngheh hmiah ni hman Wigan chuan 1-0 in hnehna an chang a, an him chiang a. Chutih lai chuan Premier League champion thei team tlem te zinga tel ve ngat, kum 11 lai a zawna Premier League khel tawh Blackburn erawh Championship lamah an tla thla ve ta thung.

Wigan Management Board chuan manager tha ban mai lova a chunga rinna an nghah tlat hlawkna an hmu a. Wigan chanchin atang hian football-a thil inthlak danglam nasat theihzia kan hmu bawk a. Inrintawknain thil a tih theihzia kan hmu bawk.

Wigan chanchin atang hian thil ni thei lo a awm lova. Mihring rinna leh beisein atanga ni thei tawh lo chu Wigan hian a nih theihzia an lantir a ni.