US magazine – TIME, khawvela chanchinbu ngaihhlut hlawh bera chhal ngam chuan footballer, Barcelona player ropui Lionel Messi chu kumin 2011 chhunga Person of the Year Award dawng tur mi 32 a thlan chhuah chhin zingah a telh a, hei hian sawi a hlawh hle.

Facebook hmuchhuaktu Mark Zuckerberg chu nikum khan he chawimawina dawngtu a ni a. Kumina dawng tur mi 32 thlan chhuah chhin zingah hian Messi bakah Barack Obama, Hillary Clinton Silvio Berlusconi leh Steve Jobs te an lang a ni. He chanchinbu hian an website-ah Messi an thlan tel chhan an ziah dan chuan, a rualpuite zinga player ropui ber, sumdawnna lama football chawisangtu mimal thawh hlawk tak a nih vang niin an ziak a.

“Khawvela football fan maktaduai za tam takin hei hi min pawmpui lo a ni maithei a, mahse Messi hi a rualpuite zinga player ropui ber a ni. Diego Maradona ang khan kum 24 a upa Argentine hian khawvela trophy ngaihsan ber World Cup a chawi lova, mahse club tana lawmman lak theih zawng zawng a la tawh a, mimal chawimawina pawh a dawng mawlh mawlh a, a vawithum nan tunah World player of the year dawng turin a hming a lang leh bawk a ni. Leo-a thiltih hrang hrang, Barca tana match 286 chiah khela goal 200 a khung tling te hian he infiamna hi sumdawnna kawngah pawh nasa takin a chawisang a, chu chu American naupangin Barca Jersey-a Messi hming chuanna, school-a an hak hnem zia atang ringawt pawh hian a chiang a ni,” tiin an ziak.
TIME editor-te hian thla leh, December hian Person of the Year dawngtu tur hi an thlang fel dawn a ni.