Tling thelh apiang pawi tih a zual

Kum 30 hnua Liverpool in English top flight nomawi an chawi boruakin Premier League a la luah hneh hle a, tun tumah erawh player ropui ni chunga Premier League – a inlan, nomawi chawi loa an hun hmang liam ta te kan thlir ve thung ang.
 
Kan hriat angin Premier League kan tih tak hi 1992 atangin khelh tan a ni chauh a, Premier League nomawi chawi lo, mahse Premier League din a nih hmaa First Division – a lo champion tawh te chu champion tawh angin chhiar an ni a, season an khelh zat erawh Premier League din hnua an record chauh chhiar a ni. Tin, an vanglai pelh tawh lama rawn khel, season rei lo te te chauh khel te pawh chhiar tel an ni lo.
 
Heng player ropui te hian FA Cup, League Cup leh nomawi dang eng eng emaw chawi mahse league title erawh an chawi thei lo a ni.
 
Steven Gerrard
 
Premier League nomawi chawi lo zinga player ropui ber hi thlang dawn ta ila, mi tam tak chuan Liverpool captain hlui hi kan thlang ngei ang. Liverpool khaw naupang Gerrard hian kum 17 chhung zet The Reds tan hian khelin nomawi chawi theih dang chu chawi kim vek mahse Premier League nomawi a nei tlat lo. Premier League Team of the year – a vawi 8 zet lang thei Gerrard hi Liverpool fans te chuan an ngaisang reng tho ang.
 
Robbie Fowler
 
Fowler hi Liverpool academy graduate niin Premier League club 4 – Liverpool (tum hnih), Leeds United, Manchester City leh Blackburn Rovers tan season 18 zet khel mahse nomawi a chawi thei lo. Liverpool tana a khelh laiin 1994/95 season khan goal 25 thunin 1995/96 ah goal 28 thun bawk mahse top scorer a ni phak lo a, PFA Young Player of the Year lawmman erawh a dawng ve ve thung.
 
Matt Le Tissier
 
Southampton legend hi 1990’s chho a English footballer hmuhnawm ber pawl a tling a, The Saints tan hian a vanglai hun hmang ralin Premier League season 10 – ah goal 100 a thunsak. Dead – ball specialist niin penalty 48 petah vawi 1 chiah a hlah a, 1994/95 season khan PFA Team of the Year ah langphain 2013 khan English Football Hall of Fame – ah lakluh a ni bawk.
 
Gianfranco Zola
 
Chelsea player Premier League nomawi la chawi lo zinga a langsar ber a ni hial ang. Serie A nomawi a chawi hnua England pan a ni a, Russian sumdawng hausa rawn inlan hma niin khatih laia club vantlang Chelsea tan season 7 khelin Premier League bikah goal 59 a thun. Chelsea Player of the Year atan tum hnih thlan niin kum 1997 khan FWA Footballer of the Year a ni bawk a, vawiin thlengin Chelsea player ropui ber pawla chhiar a la ni.
 
Luis Suarez
 
Kum 33 a upa ni ve ta Suarez hian 2013/14 season khan Premier League match 33 khelin goal 31 zet a thun a, hemi kum hian Premier League Player of the Season, Premier League Golden Boot, European Golden Shoe, PFA Team of the Year (2), Liverpool Player of the Season (2), Liverpool Players’ Player of the Season, PFA Players’ Player of the Year leh FWA Footballer of the Year te dawng vek mahse Premier League – ah a champion pui zo lo. Premier League – ah season 4 chauh inlan mahse player thawm na a ni bawk a, sawi zui tur sulhnu a hnutchhiah hnem hle.
 
Jamie Carragher
 
Ani pawh hi Liverpool chanchina player ropui ber zinga mi, Mizo te’n kan hriat lar em em a ni. Carragher hian Premier League season 17 a khel a, PFA Team of the Year bakah Liverpool Player of the Season te dawng thin mahse Champons League nomawi chawi tawh hian Premier League nomawi a chawi thei lo.
 
Robbie Keane
 
A vanglaia Premier League striker langsar ber pawl Robbie Keane hian season 13 chhungin Coventry, Leeds United, Tottenham, Liverpool leh West Ham United tan a khel a, Premier League – a goal 100 chuang thun thei player tlem te zinga mi a ni.
 
Marcel Desailly
 
World Cup nomawi chawi hlim Desailly – a’n kum 1998 a Milan atanga Chelsea a pan khan beisei a sang a, mahse season 6 chhungin Premier League – ah a champion pui thei bik lo. Premier League Team of the Decade (1992-2002) ah erawh a ang phak.
 
Fernando Torres
 
Liverpool fans te ngaihzawn rawn thin Torres hian Liverpool leh Chelsea tan season 7 a khel a. England – a pan tirh hian game 33 – ah goal 24 a thun nghal a, 2009/10 season khan game 22 – ah goal 18 a thun bawk. PFA Team of the Year – ah tum hnih thlan niin nomawi chawi lamah erawh ram tana a hlawhtlinna a chhunzawm thei lo.

 
Anni bakah hian Newcastle leh Tottenham star hlui David Ginola te, Tottenham atanga invawrh chho Gareth Bale te, 1995/96 a PFA Players’ Player of the Year Les Ferdinand te, Liverpool star hlui – Steve McManaman, Emile Heskey, Sami Hyypia, Xabi Alonso, Pepe Reina leh Javier Mascherano te, English footballer thawm na Paul Gascoigne te, West Ham star hlui Paolo Di Canio te, Chelsea striker hlui Jimmy-Floyd Hasselbaink leh Premier League game khel hnem ber ni thin Gary Speed te hi a langsar zual an ni awm e.