Top Scorer : Sawmfela, Michael leh Dampuia?

Mizoram Premier League Season 5-ah match 40 khelh a ni ta a, goal lut zat chu 89 a ni. Champion tur a la chian loh ang bawkin top scorer tur a la chiang lo a, goal ruk khung thei player pathum an awm.

Chanmari forward Malsawmfela’n goal ruk a khung tawh a, Dinthar forward Michael Lalremruata leh Chanmari West winger Laldampuia ten Ramhlun South tlangval hmain goal ruk an khung tawh a, goal sarih erawh an la khung thei bik lo.

Penalty!!!
Season liam taa Aizawl FC-a khelhna hmun chang tam lo Michael Lalremruata a la thiam reng a, Khatla tlangval hian Round 10-a Zo United an hmachhawn a goal rukna a khung.

Ding lam atanga Cho Tshering Lepcha cross chu Michael hian a tauh goal a, goal tha bik a ni. Khatla tlangval hian goal sarih khung theihna hun tha a nei zui a, second half-ah penalty petin Zo United keeper LK Lalhmangaihzuala’n a dan sak.

Dinthar FC-in Chanmari West, Aizawl FC, Chhinga Veng FC leh Ramhlun North an la hmachhawn dawn a, Michael theihna a lan zel a rinawm.

Goal khat leh!
Zirtawpni tlai inkhelah Bethlehem Vengthlangin Lalnunmawia goal hmangin Chanmari FC lakah hma an hruai a, BVT mipuiin ‘goal khat leh’ tihin an au.

BVT-in goal hnihna an beisei laiin Chanmari tan Malsawmfela a rawn inlar a, minute 90-naah siphurh sutna goal a khung. BVT tana goal khungtu Mawitea u Sawmfela hi MPL5-ah a hmuhnawm a, an match hmabakah Mohammedan striker hlui Leonce Dodoz nen an inhlawp dawn bawk avangin goal dang a khung lehzel beisei a ni.

Lalsangzuala Hmar enkawl Chanmari FC hian Chhinga Veng FC, Chanmari West FC, Ramhlun North FC leh Aizawl FC an la hmachhawn dawn.

Offside maw?
Chanmari FC captain Laldampuia hi MPL-ah Dinthar FC leh Aizawl FC tan a lo inlan tawh a, amaherawhchu tun season ang renga khelh that a la nei ngai lo.

West Warrior winger Dampuia hian Round 8-a Ramhlun North 3-2 a an hneh tumin goal ruk a khung tawh mah se match hnih chhung goal a khung tawh lo. Score sheet-a Dampuia hming lan loh tumin Chanmari West an chak lo ve ve a, 1-0 ve vein Bethlehem VT leh Aizawl FC lakah an chak lo.

Dampuia hian match hnuhnung bera I League club an hmachhawn tumin goal chu a khung ngei a, amaherawhchu offside vangin pawm a ni lo. Replay en letin Dampuia goal khung hi pawm tur nia a lan si avangin Kawrtethawveng tlangval hi a vanduai takzet.

Chanmari West-in Dinthar FC, Chanmari FC, Zo United leh Chhinga Veng te an la hmachhawn dawn a, Dampuia hi a dam tha a nih phawt chuan en bik tlak a ni vek ang.

Goal khat aia tam khung thei player-te :